رحلتي الى سوريا

تمثال

وبما انها هي المنفس الوحيد للشباب الطفرانين امثالي انا والشباب قررنا نطلع عليها الاسبوع الماضي لحتى نغير الجو شوي ونشم هوى غير الي تعودنا عليه كل يوم خميس بمقهى اليوني كافيه الموجود بشارع الجامعه.

طبعا كانت من اسوأ شمات الهوى الي مرت علي بحياتي, بغض النظر عن الاسعار الاجراميه الي كانت في ما مضى والله يرحم ما مضى من ارخص الاسعار على مستوى شمات الهوى الخفيفه والسريعه , تفاجأت بنفسية الشعب هناك ولاحظت اختلاف كبير ما بين زمان والوقت الحالي.

الاستغلال عيني عينك والنصابين هم الاغلبيه المحيطه فيك كونك سائح غريب عن هالبلد والأغرب انهم كانو يعرفو انو احنا غرب من دون ما نتخنفس ولا بحرف! بمجرد ما لمحك بيعملك مسح ضوئي من فوق لتحت ولا هو قانصك وجاي عليك بدو يساعدك ويفيدك على اساس انك طلبت من حضرتو مساعده!

طبعا قبل ما تدخل الحدود السوريه لازم تشتري حنجره حديد حتى تساعدك بمفاوضة شفيرية التكاسي بالصراخ والزعيق لانك ومهما اعطيتو زياده عن العداد مش راح يعجبو وبدو يوخد منك على قدهم عشر مرات وللأسف ما طلعلنا غير شفير واحد بس اخد منا على العداد وبس , هاد بس لانو من درعا وقريب علينا وحتى لهجتو كثير قريبه من لهجتنا ,لهيك ما صار بيناتنا أي مناقشات فيها من الالفاظ ما يسملك بدنك ويغم على قلبك.

هاد غير انو كل شفير الو قانون خاص فيه يعني اذا بتحكيلو شغل العداد بحكيلك احنا بسوريا ما منشغله واذا بتحكيله اجرتك اقل من 100 ليره بحكيلك احنا بسوريا كلنا مناخد هالقد واذا بتحكيلو اخدتني من طريق طويل بحكيلك احنا بسوريا كلنا منوخد من هالطريق!

وكان بنفسي بس امسك واحد فيهم واحكيله عمرك قرات بالجريده انو 3 شباب نطو على شفير وذبحوه؟؟ احنا بالاردن كلنا منعمل  زي هيك!

الي بحكي فيه هون بس معاناتنا مع شفيرية التكاسي هاد غير اصحاب محلات الفضه والتحف الفنيه واصحاب محلات الألبسه كمان.

بأولها معك مثل السكر واذا غلبتو شوي أو ما اشتريت من عندو بصير يحكي معك بجلافه وقلة احترام, وممكن يسبك من ورى ظهرك.

بالنسبه لشرطة السير الرشاوي عينك عينك وعلى مرئى الجميع واذا معكش تدفع رشوة هات رخصك وطارد.

وهالاشي كثير عانى منو عمي الي ساكن هناك

يعني بالمختصر الي حاب يطلع على سوريا بحكيلو

الاسعار انسى

النفسيات انسى

الاكل كويس

المواصلات كسعر كويس

كشفرية انسى

الالبسه بانواعها ومقاساتها انسى

حلويات كويس

تاريخ وحضاره ومتاحف كويس

كتتمشى كويس

الجامع الحسيني يوم الجمعه انسى

بره ما بعرف عاد

بس بصراحه أكثر اشي عجبني وحبيتو هناك هو الحمام التركي الشامي الروماني المش عارف ايش لانو اصلا ما حدا هناك بعرف شو اصل هالحمام بالزبط, لكن يعني اتحممت حمام عن 3 اشهر يعني حسيت ديناصورات طلعت من جلدي

حمام تركي.

والطلعه الجاي ناوينها على تركيا ان شاء الله

وانشالله نلاقي جو مناسب أكثر من الي لاقيناه بسوريا

ولاعبر لاعبر لاعبر…..

21 thoughts on “رحلتي الى سوريا

  1. احنا ناويين نروح رحلة بناويت لحالنا اللي هي لمدّة يوم و نرجع انا وماما و خالتي وبنات خالتي

    عدم وجود رجال ممكن ما يعرفونا غربا, مع انّا ما بنقصر بالكشرة بس اهون شوي 🙂

    احنا رايحين ناكل و نتمشى والشرا مش كتير مفكرين فيه, هي سياحة مش اكتر فشكله بتمشي

    حفظت شو اعمل
    ارشي سواقين التكاسي, و اسب عالشرطي من ورى ظهره
    و ادبح صحاب المحلات 🙂

  2. لا تعليق ما قصرت بالموضوع انوس بس ليش حاطط صورتي!!!!
    و بعدين ليش ما جبت سيرة الزلمة الي سب على الفلسطينين؟؟؟

  3. له له … شه شه

    سؤال… انت كيف رايح لهناك؟
    حسيتك انتقلت من تكسي لتكسي؟
    هو مش تكسي واحد من العبدلي للبرامكة؟؟
    او باص مثلا؟؟

    بالنسبة للتغيير … الشام تغيرت كتير …واهم اشي انها غليانة اضعاف المرات , مع هيك بتضلها ارخص من هون

    هلق كونها رحلة شبابية … اكيد لن تخلو من المصاعب والمتعة بذات الوقت

    يعني بدك تقنعني انك ما انبسطت بهالطلعة؟؟؟

    ع كل … المرة الجاي احكيلي قبل ما تطلع …بركي رحت معك … نشفان ع طلعة ع الشام

    تقبل مروري

  4. انتي أكيد أكيد بتحكي عن الرحلة تبعت القريه الشاميه.. أو يمكن عرض تاني
    المهم اذا كانت تبعت القريه الشاميه فبنصحك فيها وبشده جميله جدا بس لا تطلبو اشي من قهوة ابو حاتم لانو بدكم ميزانيه خاصه لكاسة شاي هناك.. ااااخ يا ابو حاتم لو تدرى شو صار بقهوتك من بعدك
    .
    .
    فكري بخطه تانيه واستثني منها الشرطي والدبح 😛

  5. هههههههههههههههههههه
    سنحك
    يزلمه فكنا من سمواتو الله يقطعو خلى سعيد يصفن بحاله هههههههههه
    ذكرتني فيه
    بس تمر من هول قول القصه
    طبعا لا تكتب الي ملوش لازمه

  6. أهلا أحمد
    طبعا احنا طلعنا مع شركة اسمها (تشالنج) 13 دينار رايح جاي من العبدلي لمنطقة القدم .. لكن الي بحكي عنو وعن شوفرية التكاسي هو خلال تنقلنا داخل الشام
    وبالنسبه للأسعار والله يا صاحبي احنا بعمان أهون بألف مره اسعارهم يزلمه اجرامي ورواتب بالقطاره ..وهدا سبب انتشار النصابين هناك
    طبعا انا كنت هناك الخميس الماضي ..وناوين نطلع بشهر 6 على تركيا مرورا بالشام
    تعال اطلع معنا 😛

  7. mar7aba….ana 3ndi e3terad shadeed 3la klamak…kawnak ma twaffa2t b re7letak msh mobarrer la ennak tohjom 3la el balad wo ahlo kolhom…b3dain ana la7azet enno el nas betroo7 3la amaken mo7addadeh bs el sham feha ashya2 a7la b kteer mn elle be3rafooh 3nha ahel 3amman…fa ayya makan seya7i bl 3alam mosh bs bl sham bekoon el sa2e7 feh 3ebara 3n ma7faza lal tojjar mosh aktar…wo sadde2ni 7atta be usa hada el 7ki mawjood
    wo bel nesbeh lal shorta yemkin klamak mazboot kan abel fatra,…bs halla2 el qanoon t`3ayyar bl sham wo sar el shorti elo nesbeh 3al mokhalafat ,,,ya3ni a7sanlo ykhalef wo ma yakhod rashweh
    kol balad feh el nas el mnee7a wel 3atleh…ma beseer t3ammem 3ala el nas aw 3al balad….wo ya cd elak 3ndi re7leh 3al sham ella tseer kol saneh ma tenzel ella 3alaiha…shu ra2yak?

  8. 3ala2
    حياك حبيبي 🙂
    شوف انا ما هاجمت البلد واهلها بالعكس سوريا بلد بحترمها جدا لانها بلد منتجه ومكتفية ذاتيا من خلال الصناعت المحليه الي فيها
    لكن الي دفعني لأحكي هو اني فعلا تفاجات بالرحله الاخيره مع العلم اني رحت عليها مرات كثيره
    (مش بحكيلك طفرانين)
    😛
    يعني لاحظت في اختلاف كبير ما بين أخر رحله والي كانت السنه الماضيه والرحله تبعت الاسبوع الماضي
    يعني كنت الاقي احترام اكثر وطولة بال وما كان في استغلال واضح للسائحين سواء شفرية التكاسي أو اصحاب المحلات , يعني كان لازم كل يوم نروح على الشقه مسموم بدنا انا والشباب .
    ما بخفي عليك احنا انبسطنا بس مش بالمستوى المطلوب
    وانا معك انو كل شعب فيه الناس المنيحه والناس العاطله ,,لكن الاغلبيه الي صادفناها هناك كانت من الناس العاطله..
    وبالنسبه للعرض المغري ههههههههههه مش قادر ارفضو بس بشرط واحد
    انت الي بتقعد بالكرسي الأمامي مع شوفرية التكاسي ,مشان الدقه تيجي فيك 😛
    وسعيد بزيارتك وبتمنى ما تكون الاخيره
    🙂

  9. laaaaaaaaa akeed ma r7 tkoon el akheera…wo 3la fekra heyye msh el 2ola…wel 3ard ma zal qa2eman…wo ana bag3od goddam ya cd wla yhemmak…bs el marra el jay lamma beddak tenzel 2olli wo ana badellak

  10. 3ala2
    خلص يمعلم اتفقنا 😛
    وبتشرفني بزيارتك باي وقت
    🙂
    وبالليل بفوت عندك ان شاء الله

  11. جمعية العراق
    عفوا فري متش
    🙂

  12. أهلا بك في الاراضي الاردنية

    والحمدلله على السلامة

  13. شكرا على مدونتك الرائعة

  14. أهلا وسهلا 🙂

  15. شكرا على هذة المدونة الراااااااااائعة

  16. شكرا جزيلا على هذة المقالة الجميلة

  17. شكرا على مجهودك الرائع

  18. شكرا على المدونه الجميلة و بالتوفيق دائما 😀 😀 😀

  19. أنا شب سوري وحابب علق على الموضوع الشام متغيرى علينا كلنا مو على الغريب بس وشفيرية التكاسي مابيجو غير بلقتل لأنو عنا مابيشتغل شفير تكسي ألى النوري طبعا بدون تعميم بس الأغلبية وتاني مرة ركاب مكاري ب10 ليرات بتصير وين بدك ومنشان النفسيات أنا بخالفك الرأي خصيصا بالشام بس السوريين بشكل عام وأنا واحد منهون مامن حب الخليجية فيمكن فكروك خليجي

Leave a Reply

Your email address will not be published.