كيف أصبح شخص نهفه

nelson_muntz

وزي ما عودني ما بجيبلي غير الزوار التعبانه والشاربه مية المخلل من المشاطيب والمتخلفين , وهالشي بكتشفه يوميا بعد ما اتابع احصائيات الزوار وكلمات البحث للموقع.

ومن اغرب ما وصلني زائر انتاج محلي على ما يبدو كان راسو طاقع بحيط قبل ما يتناول الكيبورد ويكتب بمحرك البحث جوجل (كيف أصبح شخص نهفه!) والاغرب ان موقعي غير ظاهر الا بالصفحه الخامسه بنتائج والجمله مقتبسه من موضوعين وتعليقين كل تعليق لموضوع مختلف, وهاد بيعني انه صاحبنا استشرس بعملية البحث وقرر انه يتصفح جميع النتائج المتاحه ليوصل لهدفه المنشود وهو انه يكون شخص مضحكه وتسلايه للناس بمعنى اخر.

اول ما شفت الجمله نزلت راسي ورفعت حواجبي وصرت اتأملها باستغراب وانا بقول بيني وبين حالي (هاد هيك ولا ضربة كريك؟!) او يمكن هو هيك بس على ما يبدو قرر الزلمه يكسر القاعده القائله “نحن شعب لو ضحكنا منموت” ويعطي صوره مختلفه عن الي انطبعت عنا كأردنين بعقول باقي الشعوب او بعقولنا احنا انفسنا.

لكن بحكيله يا صاحبي صدقني احنا شعب بدون ما تتعب راسك المتخلف او تنعمى عيونك الي غطتها حواجبك من بداية ما المحروسه جدتك زغردت يوم ما المحروسه امك نفضتك, مافي داعي لتسأل كيف تكون شخص نهفه لأنو جوجل نفسه حسيته بيضحك عليك زي ما انا ضحكت وخذ مني لو انك تتصرف على طبيعتك لتكون بكل امتياز شخص نهفه وانا شخصيا بمنحك درجة (الهاهالوريوس) بالتنهيف والهبل.

smile

صدقني يا حبيبي انه احنا مش زي ما الناس مفكرتنا كشرين ومنهاوش بذبان وجهنا, احنا مشكلتنا بس انه عنا بدمنا نسبه كبيره من الحماشه ومنعصب بسرعه لأسباب تافهه وما عليها قيمه , طيب هالأشي هاد ما بخليك تقول انه احنا شعب نهفه؟

يزلمه لما ترتفع الاسعار مثلا بتلاقي الناس دبت على عروض المخازن والمخابز مثل ما تقول راح يصير زلزال او حرب لا قدر الله بدل ما تقاطع وتعترض ,ولما البلد يصير فيها ابراج وناطحات ولسه في بتتغدى على الخبزة ومرقة الجاج, ولما تلاقي الجرايد مليانه بأسمى ايات التهاني والتبريكات لعطوفة فلان وعلان بمناسبه الترفيع والثقه الممنوحه وبعد ما يطير فلان علان بتتعبى الجرايد اياها بمقالات الشماته ونكران الانجازات الوهميه الي كانت بالعدد الي قبل اسبوعين انجازات ناهضه وفعاله, ولما تشوف الحراميه عم يسرقو عفش دار جارك وتصدف انك تكون داخل على بيتك تروح تسلم على الحرامي وتحكيليه عالعافيه يا جار!وفوق هاد ولسه بدك تسير نهفه؟

هاذي الكشره الي كنت ناتعها مش أكثر من جين ضارب جذوره في نسلنا وممتد الى ما لا انقطاع ووظيفته بتنحصر بس بتشكيل قناع بشع ليغطي على حقيقة انك بحق وحقيق.

انت مش مطلوب منك تكون نهيف وتبع مقالب لانه الشخص المضحك فعلا هو الي بينعمل فيه نهفات ومقالب والي دايما لو مد ايده يحك ظهره ليتفاجأ بورقه ملزقه ببزقه ومكتوب عليها حمار للبيع!, انت من هالنوعيه يا صاحبي ومن غير ما تحس على حالك وصدقني انك يوم من الايام لما تمد ايدك لتحك ظهرك لتلاقي نفس الورقه مقلوبه على قفاها ومكتوب عليها

Sold

راح ما تفهم اشي وراح تكب الورقه وتتابع الحك وانت مكشر, والناس قاعده تضحك عليك وانت لا عليك ولا علىالي حواليك

وسلامتك من الهسهس.

This Post Has 6 Comments

  1. Yazid

    looooooooooool yalla bned3i allah ykoon la2a el jawab ta3o hehehehhehe

    ana bansa7o be ma2 el zaher ba3d el akel o gabl el akel hehehhe

  2. berro

    ههههه
    انو ضروري هالنهفة
    يا اخي كب همومك واستمتع بحياتك بتصير اكبر نهفة
    وانو ليش قاتل حالو ليصير نهفة
    منشان الناس تضحك عليه وبالآخر بيعملو طوشة من حماشته الزيادة وهاي لحالها نهفة
    أصلا هو نهفة لأنو كتب هالعبارة النهفية
    بس يا ريت يكتشف نهافته قبل ما يعمل شي
    او يا حرام شكلو من كتر ما الكشرة تعبته قرر يشيلها
    بس بالآخر هو نهفة

  3. anOsyatE

    بقول زيت الخروع افيدلو
    xD

  4. ديمة

    انا بنصحو ياكل مناغيش 😛 😉 😀 🙂

  5. anasz

    وبنصحو يسلك بعصير منغش

  6. hanin

    الصراحة الغلا وقلة الدين والسرقات في كل الدول العربية ومش بس بالأردن، وعلى القليلة لما يصير رفع أسعار بحتجوا وبوقفوا رفع الأسعار بس اللي صاير عنا لا احتجاج ولا عشرة على الشجرة وكأن الامر لا يعنينا، بس السؤال اللي مو قادرة الاقي الو اجابة مادام الامر لا يعنيني طب ليش دايماً الناس مكشرة ومبوزة و كأنها في عزا،
    و يا عيني على أشكال الناس لما تكون واقف على الاشارة أو عند الدواوير، اذا بتطلع فيهم يا إما بفكرك بتزبط فيه فبصير يسبل بعنيه أو بيصير يجحر فيك وبدو يطلع رشاش يفرغو فيك.
    الحاصلة أنا بشوف انو اللي كان يدور عن كيف يصبح نهفة كان على القليلة كاف شر عن الناس ومريح أهله من برادته!!!! واحسن من الي بضيع وقته على مواقع أحسن ما يقال عنها أنها قذرة

اكتب تعليق على الموضوع ^__^