ابطال البروفايلات

liarman-saidaonline

اول ما بيجي على لساني “يرحم جدك” وبعدها المجال مفتوح لأنواع مختلفه من الشرشحه والتهزيئ بعد ما اشوف شخص على الانترنت بيتدلع وبتطعوج بالحكي والمصيبه الكبرى انه ماخد كمبيوتره اقساط ومكسور عليه 3 اشهر واشتراك نت وعم يشحد حق بكيت الدخان من صحابه.

اما بروفايله على التاجد عباره عن شياطين ومسوخ وعازفين قيتار ودم وقرف ولما تدور عليه بالفيس بوك بتلاقيه اشي واو فيلسوف مثقف فايع تبع طشات وأكيد صوره على ضهر البي ام على شط البحر الميت

بالشات بكون عاهه ما بيعرف غير كلمة ممكن نتعرف وانا فلان الفلاينه والماما اصلها اسباني والبابا كان يشتغل بجزر المالديف بس احنا بالبلد من زمان مشان هيك بتزلئ مني كلمة هاظ بدل

(that )

 

 

في عالم البروفايلات والشات بتقدر تكون مين ما بدك.

ابن مسئول ,مدير, صاحب شركة, ابن هيفا, جارها لكوندليزا, وانا شخصيا بواحد من الشاشات العربيه حبيت اكون “تنكي ونكي” بطل برنامج التيليتابيز المحبوب عند الاطفال واستقلت لأسبابي الخاصه.

هاد طبعا من ناحية الشباب اما عالم البنات لسه اسخم  لأني وكما اكتشفت انها عمان ما بتلاقي فيها بنات غير بالصويفيه وعبدون والرابيه ومع التحديثات الجديده بمنطقة العبدلي فراح تسير المنطقه غنيه ببنات المملكه بعد ما كانت بؤره لجماعة هاتلك صحن فول .

يعني حاب افهم انتي ليش مستحيه تحكي وين ساكنه؟ وشو المشكله لو كان عن جد ما عندك سيرلانكيه تجليلكم الصحون وتنضفلكم البيت؟

ووين الغلط لو كنتي بتطرقيها كعابي للشارع الرئيسي وبتستني باص الكوستر ليوصلك لجامعتك الي ابوكي باع مصرينه ليسددلك رسومها,, طبعا هاد لما تشوفها منزله بوست على الفيس بوك وبتقول انها كتير زعلانه لأنها اليوم ما نزلت على الجامعه مشان الدرايفر تبع البابا كان معطل بيكوز مرتو جابت ولد .. وطبعا يااي كان الولد كتير كيوت.

وبتلاقيها وهي بتكتب بالبوست امها عم تزغردلها  مشان تقوم تمسح خنانة اخوها الصغير!.

يعني يا جماعه لشو العرط واللف والدوران يعني شو المشكله لو انسألت مين انت وشو شغلتك بهالدنيا ترد على السؤال وتحكي

”  انا بفطر فلافل بخبز شراك ومرات بتداين حق النعنعات من جارنا ابو جمعه الخضرجي ولما  كنت صغير كانت الفلينه تبعتي تشحط من وراي شبرين وكنت العب مع اولاد الحاره جلول ولعبه الي بيوكل 6 شلاليت بيطلع بره.. وكان مصروفي بريزه واذا صرفت أكثر من نصها كان ابوي يحط فيي قتله الموت فيها قبل نصها بمتر”

يعني اقولك؟! ما ابن فرير الا ابن فرير وما ابن البطه السودا الا ابن البطه السودا يعني ما تيجي وتحكيلي فرير اتجوز البطه السودا وخلفو حضرتك يعني علينا يا ابو الشباب؟

وبمناسبة العرط على الانترنت قررت أكون بطل الموضه لسنة 2009 اضغط هون وشوفني

مع الشكر لأخوي العزيز أحمد عبيدات صاحب مدونة أبجد الي ساهم بشهرتي 🙂

This Post Has 16 Comments

  1. yasmeena

    هههههههههه نايس كتير
    انا اكتر وحده بكزب على النت
    مره بكون في كندا ومره بالسعوديه
    ومره مظلومه من مرة ابوي
    هههههههه
    بس جد موضوع من الاخر

  2. Ahmad

    والله انك صادق – خصوصا البنات دايما بحبو يعيشوا دور المظلومات , او يتامى , او قصص مأساة .

    كان عنا بنت بالشغل بتحكي انها من سكان منطقة بعمان , مرة تأخرت واضطرت تروح بسيارة الشغل , طلعت سكان حي معصوم بالزرقاء !!!!

    مقال رائع ومن صميم وكبد ووحل الواقع .
    شكرا أنس على المقال

  3. Jarat

    لوووول
    يا ويلي ايش هادا مالك معصب على الخلق وقايم طاخ طيخ سلخ فيهم هههه

    عن جد مافي احلى من انو الانسان يكون على طبيعتوا

    بس اناعندي سؤال عنجد ما افهمه البطه السوده وفرير خلفو مش عارفه مين ايش معناتها ؟؟؟؟ ايش هوا الفرير ؟؟ وايش معنات البطه السوده؟؟؟

    وشكرا
    🙂

  4. ميساء

    من احلى البوستات اطلااااااااقا
    يا جماااااااعة امرااااااااااااااض واحنا اللي زرعناها واحنا اللي بنكبرها
    يعني الشب ازا ما حكا مع البنت وعرط عليها انه عنده سيارة ب 80 الف دينار والبنت ما عرطت عليه انه كل لبسها من السيتي مول وكبروا ب روس بعض وطار عقلهم بكزب بعض ما بتكون العلاقة حلوة ؟؟
    نفسي افهم وين راحت جماليات البساطة بالحياة ؟
    ليه زمان كانوا يستمتعوا بالتفاصيل وانه الواحد يبدا حياته من الصفر ويفتخر ب اللي بيعمله
    صدقوني المشكلة مش بنات وشباب ومين اكتر ومين اقل
    تعالوا نجرب مرة نفتخر بحالنا لأنه احنا هيييييييك بدون اي اضافات

    تحياتي

    ميساء

  5. Yazid

    hahah that was a good one anas hehehe
    jd you can be anyone you want over the internet, but lets face it, kol hada el 7aki berja3 lal sha5syeh el d3eefeh aw ma3doomee el sha5syeh aslan
    i hate those ppl 🙂
    nice article anas 😉

    Yazid
    http://yazzzidzblog.blogspot.com/

  6. Ahmad Hamdan

    من اجمل ما قرأت اليوم, انت غشيم عن العالم عنا بحيو يشوفو حالهم ياي شكل من الاشكال, منيح ما كل واحد فيهم يطلع يحكي انا الصادق الامين وخاتم الانبياء

  7. anOsyatE

    اه وبالاخر حضرتك سكان الوحدات وامك الله يعينها عليكي
    هههههه
    شكرا الك على التعليق

  8. anOsyatE

    شو يا معلم أحمد لاحق البنت كمان
    😛
    يالله عامل حالي مو شايف 😛
    ويعني ولو حكت انها من سكان هالحي نقصها ايد رجل؟
    ولا راح يجيها مستر هاي هاي من اميركا وينزللها ببارشوت ويخطبها؟
    أكس على بنات بلدك يا معلم
    🙂 شكرا الك

  9. anOsyatE

    لا لا بالعكس مو معصب ولا شي انا اصلا لما اكون معصب بكون ماخد اجازه من الدنيا يا نايم يا ابصر وين بكون ما بقعد على النت من الاصل
    هاد لما واحد يكون عامل فيها كول وفلوس وطشات وسيارات بحكولو ابن فرير يعني انو زلمه ما بفرق بين الليره والخمسين
    اما ابن البطه السودا هاد الي دايما بيندب بحظه ومعوش يغير جوز جراباته ودايما عايش على هامش الحياه
    ووووو العفو
    🙂

  10. anOsyatE

    من احلى التعليقات اطلاااااااااااااقا
    🙂
    زمان لا كان في نت ولا تلفونات كان الواحد يجي على المخلوقه دج بعيوبه ومحاسنه وكانت شغلات تغطي على شغلات طبعا وتكون البنت حبته عن قناعه
    اما هلأ العيوب ما بتبين غير بعد ما يصير علاقه حقيقيه فمشان هيك بطلت الناس تحس بالأمور الي بتحكي عنها
    تعليقك حلو والله
    تحياتي كمان
    🙂

  11. anOsyatE

    اهلا اهلا يزيد 🙂
    يا اخي فعلا الي بتحكيه
    حتى بتذكر قرأت مقاله انو بعض علماء النفس صنفو مدمنين الشات والبروفايلات كمفصومين
    وتعال للصحيح هاد اشي واقعي
    على النت بشخصيه وعلى الواقع شخصيه تانيه
    وانا كمان بنحرق راسي منهم هالجماعه هدول
    هههههه
    شكرا الك يزيد
    🙂

  12. anOsyatE

    ايوه هاد الي الناقص
    يا اخي والله انا بنفلق من هالجماعه والي فلقني اكتر اني عم اتفاجأ ببروفايلات الشباب صحابي
    يا اخي والله الواحد فيهم ما غسل الجل عن شعرو شهر
    وعلى النت بحكي انو يوميا بعمل تسريحة واكس بعشرين دينار
    بحب احكيلك اني قتلت ناموسه هسه
    لسه وانا بكتبلك بالتعليق
    😛
    اهلا وسهلا نورتنا يا غالي
    🙂

  13. بنت الجنوب

    ههههههههههههه عنجد معك حقك …. بس انا حابه اعرف مين بكتب هاي الاشياء لانو عنجد شخص بفهم …. فأنه بليييييييز اي حدا بعرف حدا الشخص يحكيلي !!!!!

  14. hanin

    مقالة كتير حلوة وبتعكس واقعنا، بس هاد حال العرب بشكل عام وبستحوا من أشياء مش لازم يخجلوا منها زي الفقر مثلا، وهادا سبب التخلف اللي احنا فيه هلأ، الأولى انو يستحي لأنو مش عامل شي يفيد فيه دينه وبلده أو على القليلة أهله.
    مش عيب الواحد يكون غني ومش عيب يكون فقير، العيب انو يكزب ويحكي انا … وهو أصلا مش أنا. تاكزب صار في دم الناس بطريقة مقرفة ومش بس بالنتفي كل مكان ومن أقرب الناس الك ولما تسألهم ليش الكزب طبعا راح تسمع مليون عذر أولها ما بدي أخسرك.
    ونسوا أنو رب العزة حكى في كتابه “ويل لكل أفاك أثيم” وأنو الرسول صلى الله عليه وسلم حكى “المؤمن لا يكذب”، وكمان بحديث تاني أنو االكزب من صفات المنافقين ، والحكي في موضوع الكزب طويل.
    شكراً على الطرح يا أنس

  15. ترانيم ابتسامة

    والله المقال في الصميم …يعني ما بتلاقي اكزب منهم انا صراحة ما بحب احكي مع هيك ناس أول ما اشوفهم بسكر الشات الصراحة راحة ليش الكزب ما بعرف!!!

اترك تعليقاً