انوسيات,تغيرات جذريه وحرب مع فايروس الوورد بريس

السلام عليكم ورحمة الله وبركاته


مره من ذات المراري قرر صاحب مدونة موقع انوسيات انه يغير الموقع بالكامل ويحوله من مدونه شخصيه الى موقع عام مختص بكل اشي وهذا هو الحلم الي كان يشوف الاعادة تبعته كل ما حط راسه على المخده , يعني كان يفوت على المواقع الضخمه ويشوف زوارها وتنسيقها والتفاعل الي صار فيها يروح الفار تبع الافكار يلعب بعب انووس الي مش عارف اشي رايح يصير فيه بعدين

قام انوس وتعرف على بعض الخصائص الموجوده بالاسكربت المشهور وورد بريس والي هو شغال عليه حاليا حتى تكونت عنده فكره ممتازه عن مميزات هالاسكربت وكيفية تحويله من اسكربت تدوين الى سكريبت ادارة محتوى .. وفعلا راح اختار قالب بينتاسب مع طبيعة المشروع وشوية اضافات خاصه بالقالب من ثم باشر العمل حتى بنشرت فيه عجلة الامل

🙁

ولا هو فايروس ملعون الوالدين طالع مع الفايلات الجديده وشال بخت الموقع

راح انوس هد الموقع ورفعه من اول وجديد طبعا الفايروس اختفى وبعد فتره رد نطلنا اخو هالملعونه وضرب الموقع من جديد

قعد انووس بينه وبين حالو يفكر ويفكر وبلش استشارات مع الاصدقاء ورايح جاي على منتدى الدعم العربي ومن هون لهون وجد انووس الحل

طبعا كان في اضرار وخسائر كبيره لحقت بالموقع ولولا انو انووس كان يسأل عن كل مشكله ولا كان هلأ هو مسكر الموقع وقاعد يقشر بزر مطلقات

يعني منقدر نقول الى الان امور الموقع تمام لكن في احتماليه واحد بالميه انو الفايروس لسه موجود وطبعا التقصير اولا واخرا من الاستضافه

ما علينا من هالحكي كلوووو

المهم للمره العشرطعش بقول عندنا والشوق بايدينا عدنا يا احبابي عدنا ..وان شاء الله هالفايروس ما يعود معي احسن ما اغنيلكم باي باي مع السلامه يا اصحاب , او على الاقل اغنيه سنعود يوما

وبدي اكركر واعيد وازيد واقول الاخوان الاعزاء الي حاطين رابط موقعي عندهم يعني الناس الي بحبو يزوروني مشان لا يتقززو بكل موضوع جديد بنزل عندي الو خص او ملوش خص فبتمنى منهم يبدلو رابط

www.anosyat.com

الى

www.anosyat.com/?cat=6

حتى يدخلو على القسم الي فيه اخباري وكتاباتي الشخصيه

وخلال الاسبوع الجاي ان شاء الله بكون الموقع كااااامل بجميع اضافاته واقسامه ,وبالنسبه للأخوان تبعون التبادل النصي ..راح ترجع لنكاتكم خلال 3 ايام ان شاء الله

وسلامات انوسيات 🙂

4 thoughts on “انوسيات,تغيرات جذريه وحرب مع فايروس الوورد بريس

  1. ويلكم باك انس 🙂

    تم التعديل, وما تطول علينا كتير

  2. أهلا أهلا ويسبير شكرا شكرا كتير كتير
    أكيد ما راح أطول ,هيها فرجت والحمد لله

  3. ولك شو كل هالنغاشه وخفة الدم ههههه

  4. مرحبا,انا بحب اهني انس على هادا الموقع الرائع واللي بخفف على الواحد معاناتو بهالبلد يغني بسير يشوف هموهمه بضحك بدل ما يئعد ويمعط شعرو على الطالعة و على النازله…. الى الامام ياانوس 🙂

Leave a Reply

Your email address will not be published.