بطلو بدهم زلم

واخيرا..يبدو نزل اعفاء لمواليد 89 من خدمة العلم والحمد لله كابوس “صيرو زلام وبكفي ولدنه”انتهى واهلا من جديد بعصر الواكس والبوكسر ابو الوان زاهيه , وهيك راح نضل نفطر ببيوتنا لبنه وسنيوره وزيتون اخضر محصول السنه,مش وجبة غدا وحده وحبة موز من جوعك بتوكل قشرها..
ابصر عاد الحكي مش أكيد دفتر الخدمه تبعي صار مأجل 4 مرات ,
واحده منهم تأجيل من ايام المدرسه 6 أشهر مع 100 جميله من المدير والثانيه تأجيل 4 أشهر أجلتها بنفسي والثالثه برضو 4 أشهر أجلتها انا كمان,, اما هسه ما بعرف شو اللي صار بعد ما رحت على منطقة أم الأسود اللي أول مره بسمع فيها استقبلني قائد الشعبه بعباره ” جيب طلب متابعة وتفتيش وعبيه من الجبيهه وارجعلي”حملت حالي على الجبيهه وتأكدو انو لا أنا ولا أبوي ولا أمي معهم بطاقة جسور او كروت ملونه بعرفش لشو بستخدموها ونبشو شرش العيله من اصغرها لأكبرها, ولولا الحرام كان طلعو عظام جدي من القبر وفحصوها كويس ورجعوها
ثم رجعه الى ام القرود مع قرف واستفتاح بنفس الوجه السابق ,مسك دفتري وقلبه قلب وتمعن بالصوره ومرر نظرات سريعه لوجهي وختملي الدفتر ومقليش يعطيك العافيه وفوق هيك دفعني ليره ,وقال أذا بتتأخر مره ثانيه مندفعك غرامه ومنعملك قلق,يعني على أساس كانو مدلليني وحامليني على أكف الراحه ,بس أنا تفاجئت بمده التأجيل اللي هي سنه وشهرين أما مش فاهم بالزبط قرفو مني وبدهمش اياني ؟؟
ولا خلص! بطلو بدهم زلم؟

أسفين يقرابه, أنت الحلقة الاظعف

3 thoughts on “بطلو بدهم زلم

  1. مياسي says:

    وانتا ليش زعلان؟
    هايو راح عليهم زلمه؟
    مبروك عليك السنه إفراج يا مان:)

  2. سوزان says:

    والله مش عارفه ليش زعلان مش احسن الك بس جد ضحكتني ذكرتني باخوي لما يروح ويرجع قرود الدنيا بوجهه

  3. ميسو وسوزان
    لا ابدا انا مو زعلان
    بالعكس كثير مبسوط عالسنه خليهم يخفو عنا شوي قتلونا كل 4 اشهر تأجيل وخدمه خلص بكفيهم هي عندهم 2 محاسبين وقائد الشعبه وحارس عالباب مش بكفي هيك؟؟
    وين بدهم يحطوني انا :p
    شكرا الكم 🙂

Leave a Reply

Your email address will not be published.