رمضان مع الخرفان أحلى

 

losos_ramdan

لحد الان مش عارف شو قصة هالمسابقات الرمضانيه اللي صارت اذا كل واحد جمعله قرشين

 بيعملك دعايه مطنطنه على التلفزيون وبيعملك زي شيخ العشيره وبيحلف ميت مليون يمين غير يكون المسلسل ولا البرنامج برعايته وبينزل فت بهالجوائز مشان كل ما المذيعه توخذ نفس تقول “وهللللللل جائزه مقدمه من شركة فلان ابن فلان ,الجوده والاصاله تنتقل اليكم من الأجداد ليطورها الأباء وبعدين يبيعوها الأولاد ويصيرو مليونيريه ويعملولها دعايه على التلفزيون” وزي كأنهم بحملوك جميله وداحشين رجليهم بحلقك وبمننو أهلك على انك ربحت وانك واحد من سعداء الحظ الكثااار بهالبلد .

 

هو شو ضايل اشي ما تم استغلاله بطريقه ماديه بحته؟ والله ما بعرف يمكن ضايل اذان المغرب يكون برعاية البنك الاسلامي وانه لو البنك سكر خلص فش اذان لحد ما يجي راعي “مقرش” ويخلي الناس ترجع تفطر على الأذان بعد ما تحولت للفطور على اساس الفلك..

 

اذا الأعلام اللي كان اساسه توصيل المعلومات للناس ومبني على الصدق والشفافيه بنقل الأخبار , صار في اللي يطوعه كوسيله لجمع الأموال اللي الله اعلم انها كلها حرام بحرام ونصب وتحايل على الخرفان امثالي وأمثالك, لأني زي ما سمعت ان المتصلين هم من نفس الاستوديو المذاع من خلاله البرنامج وهم طفرانين من النوعيه اللي بلحوسو صحن الحمص لما يخلص وبقرقشو الصحن نفسه بسهرة أخر الليل فبيعطوهم سدة حلق بالنسبه الهم ثروه كبيره وبيحكولهم انتو ما عليكم غير تعملو هيصه وتكيفو هيك وتحكو الله يكثر خير الشركه الفلانيه والراعي الفلاني واذا بيطلع بايدكم تعيطو مش غلط ..بس المهم المنتج يطقع صيته وترتفع نسبة المبيعات وبنفس الوقت شركات الاتصالات والاستديو بيطلعلهم نسبه محترمه .

7rame

 

بهالمناسبه قررت أفتح شركة كبيره وراح أألفها قصه مرتبه وراح تكون كتالي: جدي بزمناته كان بياع فول ومره من هالمرات وكان يوم عيد تجمعو عليه الاولاد الصغار وفجأه بتوقع منه حبة فول وبيجي ولد طاير ولا هو داعس عليها وهارسها برجليه فبتلمع براس جدي فكره انه يبيع العرباي ويفتح معمل فول مهروس وبعد ما يكون ببيعه بأكواز ورق بطور العبوه وبصير يعبي الفول بكاسات راس العبد بعدين جدي بموت  وبيجي عمي وبيورث المعمل ساعيتها بكون انا لسه قاب على وجه الدنيا وطفران عايف التنكه , ومشان هيك بنصب على عمي وباخد المعمل منه وشوي شوي بطور حالي وبوسع شغلي وباخد محل الخضرجي اللي حكيون جنبي واخرها بفتح شركة فول كبيره وبعطيها شعار مرتب مثل “لا يصح الا الصحيح” طبعا بغير الشعار شوي ليتلائم مع اسم شركتي وبصير مليونير وكل ما يجي راح أكون انا الراعي الرسمي للبرنامج اللي بيجي بعد الافطار مباشره طبعا وقتها بتبطل الناس تناديني بأسمي راح اصير السيد المحترم أنس وراح أمنن الناس والعالم على الجوائز اللي بقدمها حضرتي ومشان ما حدا يزعل راح أرد اشتري عرباية جدي وأخليها جائزة ترضيه بنفس البرنامج وهيك بكون الكل معنا ربحان.

This Post Has 10 Comments

  1. eNAS

    Ramdanak Kareem bro
    bala khwaref bala TV
    dont watch it a7saan shee

  2. إباء فلسطين

    بنشفوا ريق المشاهد والمتصل ..ويا ريت بتكون الهدية محرزة..

    طبعاً بعد ما يعطوك تقرير مفصل..عن الراعي ..للبرنامج ..

    والمصيبة ..انوا هذة البرامج تعرض في رمضان..
    والمسلسلات تعرض في رمضان على نجار 24 ساعة..

    طبعاً لانهم ..لاقين من يدعمهم..

    صارت الناس تتتشوق لرمضان بسبب المسلسلات

    نسأل الله ان يحسن من وضع وحال امتنا

  3. FOX

    انوس المسبقات هاي زي ما حكا سمير غانم هي الي بتعطينا الرواتب فهمت ليش؟؟؟

  4. قط البكتريا

    القصه انو هاي طريقة جديدة ليسرقو الفلوس من جيبة المساكين ( الخرفان )
    القصه بخلو الدقيقة ب 90 قرش مثلا وبضلهم يمطمطو الحكي عشان يوخدو منك دقايق زيادة وبضلو لاطعينك لتزهق او يخلص رصيدك او بحكولك بعد 5 دقايق دخلت على المسابقة وبنرجع نتصل فيك
    واتخيلي انو محطه تافهه بجيها بحدود 15 الف مسج ومكالمة
    بالبوم
    او زي ستار اكاديمي المسج ب 40 قرش وبيوم الحلقة الاخيرة اجاهم 7 مليون اتصال ومسج وهل مصاري بتتقسم بينهم وبين شركات الاتصالات العصابة 😀

  5. Ahmad

    ما شاء الله عليك شو خيالك واسع .. فعلا كل الي قلتو صح , بس نسيت تذكر شركات الاتصالات مهي أكبر نصابة من هاد النوع بالبلد

  6. anOsyatE

    رمضان كريم
    هه ايش يا كابسه معك على شعر هاليومين
    ولك نوسااا
    كم هظول؟
    IIIIIIIIIIIIIIIIIIIIIIII
    🙂

  7. anOsyatE

    والله ببعض الاحيان بتكون الجائزه محرزه لكن معروفين اصحابهم من قبل ما يدخل علينا أول يوم رمضان والقصه انهم بيجيهم الاف الاتصالات يوميا من عوام الناس اللي مفكرين الخط مفتوح للكل عاد هو لا مفتوح ولا شي بس بيلطعوكي اكثر من ربع ساعه بوضع الانتظار والعداد عم يعد وهاي هي الفائده الوحيده من المسلسلات والبرامج اللي احنا منستنى رمضان مشانها

  8. anOsyatE

    اسألني مين هو سامر غانم واذا بجاوبك ربحني جائزه 😛

    على كلن سمير هاد شكلو بيحكي درر

    والله وأهلين بمستر فوكس

  9. anOsyatE

    يااااااااا عيني عليك
    بالضبط هاد هو اللي صاير يا عمي اساليب الله يكفينا شرهم
    🙂
    وين رابط مدونتك يزلمه؟؟

  10. anOsyatE

    مهي الاساس استاذ احمد شركات الاتصالات هي اللي فتحت المجال لهيك نوع من النصب يعني بتعرف لو مخترع التلفون عرف باللي بصير كان ما اخترعه من الاصل وضله يتغزل بحبيته عن طريق الحمام الزاجل او رساله بقنينه بحطها بالبحر هسه اسألني مين اخترع التلفون وربحني جائزه
    🙂
    متشوق اشوف كيف راح تكون مدونتك 🙂
    بالتوفيق يا غالي

اترك تعليقاً