مستحيل

 

supesdeadما بعرف ليش الناس دايما بتقول مافي شي مستحيل كون الانسان مخلوق خارق تمكن من توظيف كل ما في الطبيعه لخدمته والأبقاء على راحته ,و بما  انه هو الموجود الوحيد القادر على الاتصال بمحيطه بأريحيه وسهوله!, يعني ما بقدر انكر القدرات اللي اعطاها ربنا للجنس البشري وكيف جعل منه منتج كما هو مستهلك وفضله على جميع الخلق,لكن في حدود من الصعب بل من المستحيل انه يخترقها او يحاول يغير فيها بما يناسب اسلوب حياته.

يعني كلمة مستحيل موجوده بل هي واقع أكيد لازم نعترف بضعفنا امامها ونشعر بمحدوديتنا, ونترك عنا الشعارات اللي لا لون ولا طعمه,ليش متى واحد منا حط بباله شغله وجابها وحقق فيها نجاح كامل من دون ما يكون فيها منغصات ولو بسيطه بتقلص من شعوره بأشباع رغباته؟

بل متى كان الكمال من صفات الانسان اصلا؟

المستحيل موجود والكلمه بحد ذاتها ما انوجدت لتنفي نفسها ,يعني نقول مافي شي مستحيل!!,كل منا عنده قدراته والكل عنده طاقه محدوده ومصيرها تخلص,لا نتحرك كثير ولا نتعب حالنا الواحد ما بصحى على حاله غير صار بحدود الـ30 بعد ما افنى عمره بالدراسه والشغل والهم البايت,مشان يحكيلك انا شخص لا يعرف المستحيل..

طيب كفي بقية حياتك وانت بتباطح المستحيل وجيب قائمه وسجل انجازاتك وخليني اشوف ايش منهم اندرجت تحت مستحيل اصبح حقيقه.!

كل اللي سويته انك عشت حياة طبيعيه وطموحك كان لأهداف عاديه جدا ,لكن غرورك بنفسك وظنك انك قادر على تخطي المستحيل ,خلاك تفكر انك اخترقت حدود الكون وانجزت اللي ما قدر عليه غيرك مع انك لو عملت مقارنه كامله وشامله ,راح تلاقي كثير من الناس تفوقو عليك باشياء انت مش قدها ولا بتحلم توصل لنصها,

برأيي تخطي المستحيل هو أخر ما يفكر الأنسان بأنجازه هاد طبعا بعد ما يخلص من كل الاختراعات والافكار اللي براسه بعدين يفضي حاله ويقول انا هلأ بدي اتخطى المستحيل.

والأمثله على المستحيل كثيره ومش راح احكي ولا عن وحده لأنها كثيره ومتعدده

يعني مثلا يا جماعه لما تصحى الصبح وبدك تقوم تغسل وجهك فجأه تلاقي باراك اوباما عم يفرشي سنانه بحمامك وبعدين يحكيلك (وايت تأخلص..) بتقدر تحكيلي هاد اشي مش مستحيل؟؟؟!!

This Post Has 12 Comments

  1. Amjad

    nice blog
    my first time here
    sorry for not commenting on the topic .. i don’t have arabic letters on my laptop .. probably i do tomorrow from office

  2. ميّاسي

    يعني هو الكمال لله بالآخر
    بس الانسان بيحب يحاول ويشوف شو بيطلع معاه

    وبالآخر صعب تلاقي حد راضي عن حياته تماما:-)

  3. غني عن التعريف

    اولا صباح الخير انوس

    بس يا صاحبي انت كلامك صح وانا ببصملك عليه بالعشرة من الناحية النظرية
    المستحيل موجود واذا اسمو مستحيل ما حد تقريبا بقدر يعملو بس الناس الي بتفكر حالها بتباطح المستحيل هي بتباطح وحدة من هدول
    1 الصعاب

    2 مر الزمن

    3 تفاهة بدهم يوصلوها
    يعني كلها مش مستحيلات هاي اولا

    تانيا انتا اطرقت لشغلات عادية ممكن تكون بحياة اشخاص
    بس بعض الناس غيرهم ممكن تكون مستحيلة بنظرهم

    مثال
    روح ع واحد احكيلو بدي 15000 دينار
    بنط بحطيلك لو انو معي ربعهم كان صرت من كبار رجال الاعمال
    يا ريت بس مستحيل
    بس من ناحية تانية لو رحت ع انسان تاني وحكيتلو نفس الموضوع برد عليك
    بس هيك ؟ اطلب شغلة غانمة
    وهاد بدل ع انو مستحيلات ناس ممكن تكون عند ناس تانية بسيطة
    وبنرجع لنفس الموضوع انو هاي اسمها مصاعب مو مستحيلات

    طبعا اكيد هاي وجهة نري بس مو فرضية

    ووانشالله تكون وصلت الفكرة

    خــــــ حماد لد

  4. sozan

    مرحبا انوس
    مبروك المدونه الجديده
    انا بأمن انه ما في شي مستحيل انت بتحاول وترمي كل شي لرب العالمين وين ما بتوصل معاك بتنجي بس المهم نضل نحاول
    واللي بيحكي في شي مستحيل فهذا ما جرب وهاد في النهايه رأي شخصي وشكرا

  5. anas

    والله الحمد لله على السلامه معلم امجد
    🙂
    على فكره انا هالكمن يوم عم تيجيني مفاجات مش طبيعيه
    وهي احلى وحده منهم
    😛
    وتعليقك كفى ووفى لو ما كان على الموضوع نفسه ..المهم رجعتك يا سيدي
    🙂

  6. anas

    مزبوط الكمال لله وهاد هو اللي بقصده
    يعني الانسان بشكل عام بيطمح للكمال وهاد هو الشي المستحيل
    وما يجرب وما يتعب حاله اللي قدره ربنا هو اللي بدو يسير
    🙂 ثانكس على التعليق

  7. anas

    خالد جهاد ابراهيم حماد
    هي اسمك كامل مشان لا تضل تقول غني عن التعريف
    وهيني شهرت فيك وخليتك معروف
    اولا اشكر متابعتك وتعليقك
    بس يا صاحبي انا بعرف افرق بين الصعب والمستحيل.بس كمان مصر انو الصعب شي والمستحيل شي ثاني
    وبنفس الوقت الصعب عند ناس, مستحيل عند ناس ثانيه وكمان سهل عن ناس
    مزبوط اللي بتحكي فيه
    لكن للي بحكي عنو انا هو الشي اللي البشريه كلها لو اجتمعت لتسويه مش راح تقدر
    وواحد منهم الكمال زي ما كنت اقول من أول
    ……………………………………….
    سوزان
    واخيرا واخيرا لولولولولليييييييييييييش
    يا ميت مرحب بسوزان
    اوكي رأيك على عيني وراسي
    اصلا انا لشو موجود؟ مش مشان استفيد واسمع من اللي جربو؟
    لكن صراحه انا بأمن بوجود المستحيل يعني اللي بخلي الواحد يقول فش مستحيل برأيي هو التطورات اللي منشوفها بعصرنا هاد
    يعني مين قال مثلا انو الانسان راح يحقق حلمه ويطير.
    او انك تشوف شو بسير بأبعد نقطه عنك بالكره الأرضيه كلها وانت قاعد ببيتك
    انا صراحه باعتقادي هاي أمور ربنا هو اللي رادلنا نوصللها واله حكمه فيها
    ومنقدر نسميها تطورات مش تحقيق المستحيلات
    بالمقابل في شغلات فعلا مستحيله
    يعني مثلا تتخيلي حياة الخلود بالجنه أو النار
    مهما تواصلت سلسة افكارك الا ما تنقطع عند حد معين
    والأمثله كثيره
    والشي اللي خلاني اكتب هالموضوع هو شي مستحيل انطلب مني اسويه
    🙂
    وشاكر لزيارتك والله يبارك فيكي
    نسيت أحكيلك اياها بالأول
    😛

  8. qutaibah

    فتحت علينا جروحنا انس عن جد لو الواحد يعيش مليون سنه يمكن ما يحقق 10% من الي براسه ولا 10% من الي حققه ناس كثير حتى لو كتن يومك 36 ساعه مش 24 ساعة

  9. anOsyatE

    ههههههههههههه
    معلم قتيبه لشو كل هالتشائم يزلمه
    يا أخي بس في فرق بين واحد حاول يحقق واحد لأ
    وبعدين الفرق بين الصعب والمستحيل كبير
    بس برضو الانجاز موجود
    🙂
    هديها شوي فش اشي مستاهل
    🙂

  10. Chris

    Hello
    a small mark at the time of my passage on your very beautiful blog!
    congratulations!
    thanks for making us share your moments
    you have a translation of my English space!

    cordially from France
    ¸..· ´¨¨)) -:¦:-
    ¸.·´ .·´¨¨))
    ((¸¸.·´ ..·´ -:¦:-
    -:¦:- ((¸¸.·´* ~ Chris ~ -:¦:-
    http://SweetMelody.bloguez.com

  11. olashk

    مرحبا انوس
    بالنسبه الي بحس انه الواحد ازا توكل على الله واخد بالاسباب وتعب حاله شوي ما عليه صعب ، يعني بالنسبه الي كنت احكي عن كتتير مواد بالجامعه مستحيل انجح فيها ومستحيل تحل عني
    بس مع بذل المجهود والتوكل على الله اقدرت اتحداهم وانجح فيهم عرفت علي
    وبالنسبه انه يكون اوباما عندك بالحمام بفرشي بفرشايتك هههههههههه كمان هاي مستحيل لانها مش منطقيه فكل شي منطقي ممكن يحدث اما الاشياء الخارقه وغير المنطقيه فعلا مستحيله

    تحياتي علوووش

  12. olashk

    ابعدووووووووووووووووووووووا عن التشائم والله رح تندموا ازا ضليتوا متشائمين تفائلوا يلا واضحكوا بتعرفوا اختي دايما بتقلي انه لازم الواحد دايما يحط الخيار الاسوء وبعدين الاحسن انا طبعا العكس الحمد لله دايما متفئله

    تحياتي للكل علا

اترك تعليقاً