لعبة الصراحه

كان من احلى الايام اللي سهرنا انا والشباب للصبح يوم اللي كانت قبل الاخيره

رغم انو التوتر والقلق سيطر علينا الا انو كنا كتير نتمازح ونلطش حكي ومرات كفوف

اعطيناها جو كتير حلو ولهلأ متزكرو بتفاصيلو

طلع واحد من الشباب قال عندي فكره …!!! شو رأيكم نلعب لعبة الصراحه

ومنغير جو ومنكتشف بعضنا اكتر وما بتزكر مره لعبناها

قلنا كتير حلو … بس جو السهرة كان خالي من القزايز وقناني البلاستيك. فاخترنا موبايل واحد من الشباب لانو كان اتعس جهاز بالمجموعه

لانو كان ما يتضرر من اللف

…………………………………………..

وبلشنا اللعبه

كان من الشباب واحد الله يسهل امرو وين ما كان يكون

كان دايما يحكيلي انت يا انس اخوي التالت والله لو تدري كم هي معزتك بقلبي لتفديني بعمرك

وانا كنت احبو وما كنت متخيل يوم اني افارقو

… صاحبنا اجا دوري اسألو السؤال اللي لازم تكون اجابتو صريحه وواضحه

سوالي كان بالحرف الواحد: ضللها 3 ساعات تقريبا وانت عارف انو كل واحد بسير بالجامعه بنسى صحابو اللي ضلو اقل منو بالنسبة لمستوى التعليم

فاذا ربنا وفقك وكتبلك النجاح راح تنسى صاحبك انس؟؟

جاوبني جواب مختصر وقصير: احنا يا انس مش صحاب احنا اخوان

كملنا اللعبه هييييك لحد ما طلعت النتائج الساعه عشرة تقريبا

انا ما توفقت بس هو الله يزيدو توفيق نجح وبتميز كمان ومن يومهاا لهلأ وبدون مبالغه ما شفتو غير اربع مرات وما اجاني منو غير 5 مسجات اللي كانت باغلب الاوقات مكلمات
كان المفروض طلعناه من اللعبه … لانو ما جاوبني بصراحه

هاد الموقف تكرر معي مرتين بنفس هديك الفترة

الاصحاب بلا فايده كل واحد فيهم بشوفك على انك الكيس اللي بفرغ فيه همومه واحزانو بحب تكون واقف معو بعز دين محنتو اما هو لما يشوف احسن منك ويعيش ظروف اسهل من اللي كان عايشها معك
واذا غلطت بكلمه غير مقصوده او كان قصدك المزح

بنساك … المسج بستخسرو فيك

مكالمه دقيقتين بقول لأ خليهم لصاحبتي اللي بالجامعه

اقلها ابعت واحد من الشباب واحكيلو سلم على اخوي انس

انا هاد هو اقل شي طالبو من اللي كانو يحكولي انت صاحبي. ووالله ما تطلع من قلبهم

كتر العزله والوحده … وكتر فراق الاصحاب بولد الاكتئاب والاحساس الدائم بالفشل

وخصوصا لما تكون ظروف السكن صعبه وبعيده عن الناس والحركه

ولأ اول مره بحياتي بأيد المقوله اللي كنت دائما ضدها

احببت الكلاب …… من غدر الاصحاب

وبعزي نفسي بقول الشافعي

وفي الناس ابدال وبالترك راحة …… وبالقلب صبرا للحبيب ولو جفا

This Post Has 12 Comments

  1. eNAS

    Mn 5leal tjrobti b7kelak ino 95% mn kalamak sa7,
    5sosan elfatrah el a5eerah,la lesa so7bet elmadraseh awfah o asdag,,bs tfoot eljam3a betshoof elblawi elsodah,95 mn elnas hnak bed7akoo bojhak mshan elm9la7a mn first class,
    Bas ya Anoos en 5elyat 5erbat,3ndi sa7beh mn ayam elmadraseh,benafs eljam3a bs ya doop shofha,ma bakadeb 3leek ino lma shofha b7s 7ali ino ma 3’ebna 3n ba3ed,el7ayah betsh3’el bs m3na elma7abeh wel wafa2 ymken ma et2ather feo elmasafat,
    7beet a7kelak halmathal,
    Kalb 9adeeg 5aer mn Sadeeg Kalb,
    😛
    bs inshalah ma benowasel youm la haldarajeh:)

  2. Anonymous

    بدي احكيلك اشي يا انس
    انت بعدك صغير في العمر وما عندك هديك الخبره في الدنيا .. يعني لسه بعدك طالب مدرسه
    انا بدي احكيلك من واقع تجربتي الخاصه .. ما في اشي في الدنيا اسمه اصدقاء .. هدا كله حكي فاضي .. العلاقه اللي بتجمعك في الاخرين هيه علاقة زماله .. يعني ناس بتصاحبهم لفتره معينه بسبب وضع معين مثل زملائك في المدرسه او في الجامعه او في العمل .. وتنتهي هذه العلاقه بزوال سببها .. يعني بس تترك المدرسه وتروح عالجامعه بصيرلك شله في الجامعه وبتنسى شلة المدرسه ولما تترك الجامعه وتتوضف بصيرلك اصدقاء في العمل وبتنسى شلة الجامعه ولما تترك الوضيفه بتنسى زملائك وهكذا
    .. انا مقدر موقفك هلا لان انا عارف ان انت لسه صغير بالعمر بس ان شاالله كل ما تكبر رح تفهم الكلام اللي انا بحكي فيه اكتر ..
    عشان هيك ما تلوم اصدقائق السابقين لانهم بشر متلهم متل غيرهم ..
    بعدين ما حبيتها منك هدي صحبت الكلاب ..
    انت يا انس اسمك على اسمي مشان هيك لازم تكون دائما متفائل وتعتبر ان اي مشكله بتواجهك في الحياه درس تتعلم منه .. وما بدي اسمعك مره تانيه بتحكي بلهجة الاحباط والفشل ..

    أنس – أوهايو

  3. مياسي

    الحياه تلاهي يا أنووس

    و من واقع خبره بكره بتكبر و بتشوف انو زي ما الناس بيتلهو عنك انتا كمان بتتلهى عنهم و بتنسى

    بتصير تصغر علاقاتك اكتر و تعمقها بنفس الوقت و بتتعلم ما تزعل من حد و لا على حد

    هو بس الواحد و هو صغير بيكون يستنى كتير من الناس و الحياه بس كل ما بطل يستنى كل ما صار وضعو أحسن و هاد شي بيجي مع الخبره و الوقت

    هلأ تعال لهون :
    شو يعني ردودي بتخنق؟ هاي ما فهمتها ؟؟

  4. Amjad Wadiِ

    عزيزي أنس
    اسمحلي أدلي برأيي بالموضوع

    أكيد فيه صداقه .. و فيه أصدقاء .. بس برضو .. مش كل واحد شربت معاه قزازة بيبسي صار صديقك … مش كل واحد سهرت معاه و دخنتوا و قصدرتوا .. و سولفتوا عند سور المقبرة .. بعيد عن ضو لمبة الشارع صار صديقك … و مش كل واحد حكالك بلعبة الصراحة انه بفديك بروحة صار صديقة

    زي ما حكولك ايناس و أنس و مياسب .. الحياة و مشاغلها كثيرة .. و فيه ناس بصير بينك و بينهم عشرة المفروض ما تنساهم ولا ينسوك .. حتى لو انقطع التواصل لفترة

    و بحب أحكيلك انه كل مرحلة من الحياة بتلتقي فيها بناس و بتصيروا على درجة من الصداقة بس الظروف بترجع بتزتك بعالم و همه بعالم .. و على هالمنوال

    وأنا بنصحك نصيحة أخوية .. دائما خلى حاجز أخير و لو صغير جدا بينك و بين أصحابك و ما تنفتح كليا لأحد و ما تحط كامل ثقتك بصديق .. شوي هون و شوي هون .. و خلي دائما حدود و احفظ خط الرجعة .. لأنك اذا انقرصت و ما تعلمت راح تنقرص مرة ثانية و ثالثة و هاشرة و عمرك ما راح تتعلم

  5. العبيط

    انس ، انا اللي شايفه انو 95 % من التعليقات عملتك صغير و ما عندك خبرة في الحياة

    و شكلك مش من متعلم من مدرسة الحياة شي يا انس

    و كلمة لكل الشباب اللي هون
    من لم يتعلم من دروس الثلاثة الاف سنة الاخيرة يبقى جاهلا الى اخر عمره

  6. Amjad Wadiِ

    You are tagged .. i hope you don’t mind it 🙂

  7. Amjad Wadiِ

    والله يا عبيط مش هيك القصد .. أنس بعرف أني بحترمة و بقدرة و ما بعمل عليه معلم و لا خبير … بس أنا حكيت رأيي المتواضع …

    وبصراحة .. أنا عكس ما كتبت بآخر جملة لا بحفظ خط رجعة ولا بتعلم من الي بصير معي .. بس برضو هيك رأيي

  8. @ !\! o o o $

    هلووووووووو شو اللي صاير هوون؟؟
    كل اللي غبتهم يومين بس!!! سوري شباب الموقع هاد ما كان بفتح معي ما بعرف ليش كان يدخلني على بعض الصفحات
    ممممم
    طيب
    نوسا :يسلمو كلامك حلو
    Kalb 9adeeg 5aer mn Sadeeg Kalb
    ههههههههههه عجبتني لفيلي اياها 🙂

    ooooooooo انس زمان عنك يا انا كيفك
    يسلمو كتير على ردك والله انو جد اشي بشرح الصدر
    بس انت لو كنت تشوف كيف كنا والله ايام حلوة تخيل انو واحد منهم طردو ابو بره البيت اجاني ونيمتو عندي
    كنت مستعد اخدم بعيوني
    بس خلص هو شاف ناس احسن مني شو اغصبو؟؟
    وحلو الواحد يفضفض
    بخف الضغط شوي
    وابقى مر وورجيني صفحتك

    مياسي بعرف مادح نفسه كذاب بس سدقيني اني ما قصرت ولا مع واحد فيهم وا بالعكس اذا سمعت انو متدايق او محتاج مساعده ما بحكيلك انا اول واحد ارحلو لا بس كنت اعمل المستحيل مشان يكون مبسوط وباحسن حال
    مصطلح صاحب كان بالنسبة اللي اشي كتيير مميز وكنت وما الو تعريف يليق
    بس هلأ بلا معنى

  9. @ !\! o o o $

    امجد انت رايك على راسي وهي ردك قرأتو اكتر من اربع مرات
    هو انا ما قلت انو بس مشان قلي انت صاحبي صرت صاحبو
    انا قصدي على الايام اللي قضيناها مع بعض والروح اخت الروح
    هلأ هو عندو اعذار كتيرة
    مشغول
    والمحل
    والاهل
    كلها اشياء كنت انا ابدى منها بالماضي
    هو اللي بسير بالجامعه بسير يحب المحل والاهل؟
    بس للاسف انا حطيت كل ثقتي بصاحبي
    واللي بقلبي على راسي لساني
    هيك طبيعتي
    وهيني انقرصت
    🙁

    عبيط مش غلط اني اسمع نصيحة ذوي الخبرة حتى لو كانو اصغر مني
    الخبرة ما الها اي علاقة بالعمر
    انو انا زغير او هم ازغر مني
    اما انو مش متعلم شي بالعكس
    بس كيف بدي اوضحلك الموقف؟؟
    طيب هلأ لو واحد كان بسفينه ووقع بالبحر فجأه راح يسير يلاخم بشكل عشوائي ويفقد التركيز تماما ومافي مجال للتفكير بمنطقيه
    بس انت بتكون شايفو من ضهر السفينه وبتقول ول شو مالو هاظ؟؟ لو يرخي حالو ويعطيها واحد ريلاكس سفري
    لحد ما حدا فينا ينزلو ويقدر يساعدو كان ما صارت هالكركبه
    انت عم تقرأ كلامي وبحكم خبرتك حكمت علي انو ما عندي خبرة
    بس هاد الحكي طلع من انا لاني كنت كتير متوتر ومتدايق
    بس الحمد لله الامور ماشيه تمام
    وعلى فكرة انا ما بمانع انو امجد يفيدني برأيو او غيرو
    بالعكس انا اللي بطلب مساعدتهم
    وبستفيد منك انت كمان

  10. @ !\! o o o $

    اوكي يا امجد هلا بروح عندك وبشوف شو هو هاظ

  11. Zololkis

    SECURITY CENTER: Look Please Here

  12. نادية

    الحياة مليانة مفاجات كبيرة وصغيرة مرة بتتفاجأ بصديق مرة بكلمة حكاها شخص وجرحك وضل ماشي وما اهتم مرة بموقف ممكن مقصودوممكن لاء الصداقة موجودة بكل مكان بس مشكلتي انا بدور ع الصدق يا ترى وين راح 🙁

اكتب تعليق على الموضوع ^__^