Anosyat

قال مره عوض ابو شفه كان قاعد مع جبر على سطح الدار بحي النصر , فأخو عوض اسمو غايب وعلى ما يبدو انه غايب هاد زلمه راكز وصاحب دين على عكس اخوه عوض الازعر المقلع..

فا غايب هاد طلع مع امه المسكينه على الحج قبل ما يرميها عوض من على السطح بعد قصه

(أولاد تسعه)

فجاه جبر وبسأله .. اه يا عوظ ولك وينه اخوك غايب يا عمي والله اشتقتله

فقال عوض والله يخوي يا جبر غايب طلع  هو والوالده على الحج.. فا جبر وبأسلوب الاذكياء الغير معهود بينتاهم قال : اهاااااا يعني غايب هسه مع امه وأمه صارت حجه اذن الغايب حجته معه

ومن هنا تم اختراع المثل العربي الشهير الغايب حجته معه.. ويمكن المثل اردني هاد بسبب انه احنا جماعه هوايتنا الطعوجه والتملل قبل ما نلحق موعد محدد من حركة اسبوع زمان.

طيب شو قصة المقوله المعروفه (مطرح ميسري يمري)؟؟

لو سألنا عوض ايش قصة هالمقوله؟

أنا اتوقع راح يكون جوابه كالتالي طبعا بمساعده وتركيز من صاحبنا جبر.

اهاااااا شوف يخوي يا انوس.. هاظ بقولك ميسري زلمه عمره 16 سنه وكان ابوه يخليه ينام بغرفه لحاله مشان ريحة رجليه دايما طالعه وزهقو اهلو قد ما اشترو نفثالين وهم يحطو فيه بالبوت تاعه كل يوم الصبح, وبنفس الوقت ميسري هاظ كان زلمه حمار بالمدرسه وكان ابوه كل يومين يحشره بغرفته ويتناول الشحاطه البلاستك وينزل فيه سفق لأنه حمار وفش منه فايده..

يعني المسكين اكل قتل لوزع على قرايبه وحبابه, ولما ابوه شافه زي هيك قاله : والله يا ابن الكلب لأوديك على الجيش خليهم يوكلو لحمك أكل انت بس اصبر علي سنتين زمان.

وبالفعل ميسري صار عمره  18واجى موعد يوديه ابوه على الجيش … وراح ميسري.

بعد فتره ولا هي ام ميسري حامله بولد ولما خلفته قال ابوه والله غير نسميه يمري.. يعني صار عندهم ميسري ويمري , فلما كبر يمري  قالت ام ميسري لأبو ميسري وهم قاعدين على سفرة العشا : يا زلمه ابنا يمري كبر وصار لازم ينام لحاله فشو رأيك انت؟

قام الأب صفن وصار يفكر وهو بيوكل فجأه ولا هو تشردق .. قامت ام ميسري وصارت تدح بجوزها وتحكيله خلص يزلمه خلص يمري بسير ينام محل ميسري ولويش كل هالصفنه يبن الحلال؟؟

يعني ببساطه (مطرح ميسري يمري) .. هون راحت الشرقه عن الزلمه وبينت على وجهه ملامح الارتياح … وصار من يومها وكل ما هم قاعدين على العشا بيتذكر ابو ميسري يوم ما اتشردق وهو بفكر بالحل, وبمزحه بايخه والمقصود منها تلطيف الجو  بقول ابو ميسري لمرته: مطرح ميسري يمري اه؟؟ ينعن ابو الي خلفتش شو انتش فهمانه

وبموتو التنين على حالهم من الظحك..

واتوقع انها القصه الصحيحه لهاي المقوله الشهيره

تلميح: هذه المقوله تقال للشخص الي عم يوكل وهي بديله لكلمة صحه وعافيه ويمكن للأردني فقط الاستغناء عنها بكلمات وعبارات أخرى مثل ( سطح, مزع , بعج ,الي بيوكل لحاله بزور, سم الهاري, ريتو الأكل يوقف بزورك) وغيرها

طبعا الكلمات فقط بحال كان الشخص يقوم بعملية الأكل مع العلم انه هناك عبارات أخرى قبل وبعد القيام بالعمل.

أتــرك تعليــق