دوبلاج

لحد الان وانا بفكر بسر انجذاب نسوانا العربيات لشخصية بطل المسلسلات التركيه “مهند” رغم وجود كثير من الممثلين اصحاب السحنات الفتانه والجذابه وأغلبهم من أصحاب الجنسيات الغربيه , وانه ليش ستين مليون وحده خربت بيتها مشان صوره بتلفونها للممثل الطاووس أو تعليق استفزازي قدام “بعلها” صاحب الشنبات مساقي الصقر

mohanad

هو يمكن يطعمني حجه والناس راجعه وانو شو اللي خطر ببالي أفكر بهالسؤال بهيك وقت يعني وبما انها المسلسلات الرمضانيه والمسابقات طغت على المسلسلات التركيه وتقريبا قللت من شعبيتها أو لفتره من الزمن لكن ما زال عندي شعور بوجود سر أكبر من كون الممثل متكتك وحليوه وجاي موقعه بالمسلسل كبطل قصة حب.

هسه المسلسلات الأجنبيه بالنسبه النا كشباب مش أكثر من وسيله “نتمعرط” فيها على الفيس بوك وبالجامعات قدام بعضنا بدون ما نعرف قصة الفلم او لشو تم انتاجه أو حتى تاريخ رواجه لأنه في منا مثل بسس الحاويات أي شي بيكسد وبتبطل موضته بره بزتولنا اياه بمزابلنا مشان أبو ريحه صار عنده ستلايت وبيحضر انجلش ولازم يكون قدام اصحابه كتير مودرن ومتابع أفلام.

يعني المسلسلات والأفلام بالنسبه النا مش أكثر من فن تصوير ولا ما كان حد سمع برامبو ولا فاندام لأنهم الاثنين شغل بوكسات وشلاليت بس أما سبب الفلم وقصته غير مهمه بس اللهم شافو بيدخل على معسكر مافيا ولا اشي من هالنوع وقام فيهم كلهم وهو لحاله وهاد سبب اطلاق المقولة الأردنيه الشهيره عند ما يتعرض شب واحد للضرب من أكثر من شب “عشره على البطل! ينعن أبو المخرج” طبعا معلومه للما بيعرف.

أتوقع انه السر بالتالي

الأفلام العربيه تجذب المتابع لسهولة فهم الفكره والوضوح في اللغه أما الأجنبيه فجاذبيتها في فن التصوير وتكتيك المشاهد والعنصر الأهم الممثلين, هون صار في دمج بين اللغه والتأثير السينمائي حتى يختصرو على المشاهد إحولال العيون (وهي مصدر حول) في محاولة تلحيق الترجمة وقرائتها.

فكيف لو خلينا مهند يحكي عربي وأختصرنا الترجمه والتركيز على القصه ؟

فلو كان مهند مثلا “ببربر” باللغة التركيه في مسلسله نور أو ميرنا وخليل وعلى نفس قناة (أم بي سي فور) لما استنضفت مخروبة البيت توقف لحظه لتشوف مين هالممثل الي انطبلت الدنيا بسيرته ولمرت على القناة مرور الكرام  وما كان دفعت ابوها حق فرشه جديده لتنام عليها .

mbc_max

شمعة مهند طفت خلص وراح يبدأ موسم جديد من موضة التطليق والكحش بسبب المسلسلات المدبلجه

حاليا قناة (أم بي سي ماكس) شغاله على دبلجه مجموعه من الأفلام الأجنبيه التاريخيه , لكن متى العرض وكيف وليش أنا ما بعرف

وبرأيي كانت خطوه ذكيه جدا من ادارة القناه لأستقطاب أكبر عدد من المشاهدين العرب.

ومن هاي الأفلام

Alexander و Troy  و Brave heart

وعلى حد علمي جميع هاي الأفلام فيها ممثلين من النوعية المفضله لنسوانا العربيات

فا بقول ديرو بالكم يا جماعه واللي حاب يحافظ على مرتو بالبيت يروح يعطي الستلايت لواحد عزابي لأنه الي مرته ما خربت بيتها من ورى مهند فراح يخربو بيتها ( براد وميلجبسون ) وخصوصا انهم صارو يحكو عربي.

10 thoughts on “دوبلاج

  1. انوس حبيب الملاين
    انت ما سمعت عن مظاهرة طلعوها النسوان في مصر عشان سبو عليهم شيوخ الجوامع
    المهم نسوان مش عاجبهم العجب من الاخر

  2. هلأ هوه كلامك صحيح وكل البنات بحبوا المسلسلات التركيه بس هلأ راحت موضتها يعني هيه عباره عن مسلسل مسلسلين وخلص يعني متل كساندرا وانا شخصيا ولا عمري تابعت مسلسل تركي لأني بزهأ وما في قصه وكلو كزب

  3. على اساس انو البعل مش ذابح حاله على لميس ونور .. ولا بحب انجيلنا جولي … وشايف مرتو احسن من مية وهاي التانية ايش اسمها اللي كانت مع مهند بس كان اسمه خليل .. ايوا ميرنا

    مهو يا انس اللي بحكي بحكي على الجهتين
    ولا كيف ؟
    الله وكيلك الواحد مش لاقي وقت ينام مش مشان يضل سرحان بشعرات الاشقر الطويل هاد
    :S

  4. علوووش says:

    ههههههههههههه انه عليك مواضيع يا انووس جد فزيعه يخرب عقلك من وين بتجيبها وله ؟؟؟؟؟؟ وبتكتكها هيك يا عمي مش بحكيلك دايماااااا يامخ ؟؟؟؟؟
    المهم انا بوافق رأي ايناس الزائره الي فوق فعلا الرجاااااال كمان عينهم زايغه ليش بس النسوان يعني وهو لو العصمه بأيد المره كان هي طلقت زوجها من كتتر ما بيبصب على نور ولميس … وهلم مجره بس شو تسوي العصمه بأيده المهم الحق مش على الاتراك الاذكيااااء الي بينتجولنا هيك مسلسلات الحق على العرب الاغبياء الي بيترجمووها للعربي علشان ينشروو الفتنه اكتر ما هي منتشره الله يعينا شو رح يجينا بكره من ترجمه الافلام الاجنبيه للعربي والله ايدي على قلبي من هالافلام بالانجليزي ومش خالصين كيف بالعربي؟؟؟؟؟؟ يا ساتر

    مشكوووووووووووووور انوووووووووووس على الطرح المميززز

  5. أول مرة بجمد ربي على نعمة العزوبية

    وكمان بحمدوا على نعمة العقل

  6. شكرا شكرا الكم ايناس وعلوش حسابكم بعدين :p

    فوكس شكرا يا مان تحريت عن الموضوع

    يا سمينه ..مش معنى اسمك يا ناصحه؟

    أحمد الحمد لله على كل اشي بس جديده علي شغلة العزوبيه :p

  7. عاوز برنامج يدبلج الصور ممكن؟؟؟ 🙁

  8. أكتر شي عجبني ( براد وميلجبسون ) صارو يحكو عربي ههههه، أنا كبنت عمري ما حبيت المسلسلات التركية وخصوصا مهند- ممكن لاني ما بحب شكله أصلا- وقصة الحب في مسلسل نور بعتبرها خيال علمي والواحد يعيش بالواقع أحسن، عشان هيك بنصح العربيات سيبكو من مهند، لانه لاعادتنا ولا أفكارنا متلهم والأهم لانو اذا ضليتك ورا مهند راح تنصدمي بالواقع تاعك وهو انو زوجك المحروس عمره ما حكالك كلمة شكرا فكيف تتجراي وتطلبي منه ورد مثلا، وعلى قولتهم قلة الشوف أحسن ولا عين تشوف ولا قب يحزن

  9. والله اشكرك على الرد بس بصراحه انا ما بفوت على الموقع كثير لهيك مش عم ارد على كل التعليقات الي بتيجي
    فبعتذر عن انقطاعاتي ..بس خلص شغل المواقع ممل ومتعب بصراحه
    وبتسعدني زياراتكم والله وأكييد لو بلاقي مشرفين ما بقول لأ
    والله يهونها
    🙂

Leave a Reply

Your email address will not be published.