طبعا طبعا بعرف انه رمضان صرله زمان مبلش حتى يمكن بلش العيد وانا لساتني ما قلت كل عام وانتو بخير بس والله معذور يعني انشغلت بقصه الله اعلم فيها وصرت أفوت صدف ,اللي عم يسير اني بروح من شغلي شايف الديك ارنب هاد اذا انا شايف من الأصل بعدين بروح بعطيها نوم شديد لقبل الاذان بساعه طبعا بهالاثناء بتكون اكتملت صورة الارنب وبس يأذن بيرجع الديك لوضعه الطبيعي ويا دوب بلحق اقول الحمد لله الا هو أخوي قاعد على الجهاز وبما انه رمضان شهر الفتوحات فأنا لازمني جيش مشان استعيد مقعدي على الكمبيوتر وهاد الاشي مش عندي وما بقول غير سلمها لربك

كمان بدي اقول عن شغله بتقهرني كثير..اني صرت اشوف شباب كل واحد فيهم قد الحيط رايح على زاويه وماسك السيجاره وبعفط فيها بعز دين النهار ولا كأنه الدنيا رمضان ولا كأنه في رب راح يحرقه ويخليه يتندم على اللي بسويه, بالمقابل أخوي الصغير بصوم يوم كامل وبيعرف منه ومن حاله ان صيام رمضان فرض علينا ولازم نقدر حرمته طبعا بغض النظر عن انه يوميا هو كمان بشاركني بمسلسل الديك والأرنب ,بس بكفي انه عمل اشي ما قدرو عليه شباب كل واحد فيهم لو مال على حيط …لضل الحيط محله !! يعني بالعقل في حدا بميل على حيط وبهده؟! لأ بس انه الواحد فيهم عنده قدره على الصيام وعنده كمان قدره على التحمل والصبر على عكس الاطفال الصغار

على كلن كل عام وانا وابوي وامي واخواني وجيراني واصحابي واحبابي وشيخ الجامع والشباب بالهاشمي والاخوان بالعراق والجزائر والسودان والصين وماليزيا وجزر الكناري وشباب الحاره والعالم كله بألف  خير وينعاد علينا بالصحه والعافيه, وبعد كمن يوم ان شاء الله راح انزل صور لأشغال يدويه عملتهم أمي مشان رمضان ..بس بستنى بواحد يكون شايف الديك ديك ويفضي حاله ويصورلي اياهم

للمره المليون كل عام وانتو بخير

أخي الصائم ردد من بعدي

أما اذا شفت هذا المخلوق الغريب في نهار رمضان فأنا انصحك تروح ترتاح ولا تحكي مع حدا لأنك اذا حكيت تأكد انه صيامك راح يكون على الفاضي

أتــرك تعليــق