Anosyat

وأنا عم أفكر بموضوع جديد انزله بالموقع اجت ببالي وبساعة هبل انها التهجئه الصحيحه لكلمة سور هي كيف بالزبط؟

سور ولا صور؟

بكل تأكيد هي سور بس زي ما قلت بالأول كانت ساعة هبل..المهم تذكرت موقف صار معي وانا بالشغل

احنا طبيعة شغلنا جاي على تسلسل ان الزبون بيتصل وبيطلب طلبيه بعدين بتتحضر كل الأغراض بمكان واحد بعديها بتنكتب الفاتوره اخر شي بتطلع على الباص ومنها لعند الزبون.

فكنت عم احضر بواحد من الطلبيات وكانت ناقصه كثير اغراض ولازم اسجلهم على ورقه خارجيه مشان اجيبهم من المستودع فا وأنا عم أكتب ومعجوق وقفت وصفنت بالورقه شوي..وبشلت اتمتم اس سسس سب اسبب

أخر شي نطقت هالجوهره وكتبت (سباغتي) فقام الوالد وشاف الكلمه وبلش يعطيني نظرات مش ولا بد ولا هو سالخني  هديك الكلمه .. وقال:هلأ انت دارس توجيهي؟ هيك بتنكتب الكلمه؟؟

طبعا وجهي صار شبه تلفزيون عمان ايام ما كان يسكر على ال 12 بعد السلام الملكي زي (شششششششش) وصرت اني لازم ادافع عن حالي …مستحيل شو هالموقف المش موقف هاظ؟!!

قلت والله يا انووس ما لك غير الفصحنه والفلسفه..أول شي خذ نفس وهديلي حالك لا تفكر كثير وكلشي بيجي على لسانك احكيه على طول  ايوه هيك امورك تمام يالله عليهم

قلت: لأ يا يابا مزبوطه الكلمه اصلا هاي مش كلمه عربيه وما الها قاعده نمشي عليها وكيف ما منكتبها بتنكتب..اما لو عربيه فصحى اه بحكيلك الغلط مني صح يابا ؟؟ صح؟ اه احكيلي صح؟ من وقتها لربع قرن وأنا بسأله اذا صح ولا مش لأني متأكد انه راح يحكيلي مش صح ولازم الابن دائما يطلع غلطان :p قول مشي الموضوع واتلفلف بسرعه..اجيت بدي اروح على المستودع واجيب باقي الطلبيه أنا وواحد من الشباب..رحت واصل نص الشارع ولا هو عمي بنادي على الشب اللي معي وبيحكيله هات الورقه وتعال..راحله الشب ورجع وبيحكيلي ضافلك اغراض على الورقه بس هدول بدنا نجيبهم بعد ما نطلع بالجوله..

مسكت الورقه وصرت اتطلع فيها وصفنت كثير كثير ولحد هلأ نفسي افهم.. هلأ شو أصل الدبس معقول كانو يروحو على روما ويعصرو أهلها ويصنعو منهم دبس؟

لأ هون أعتبر نفسي جاهل لأنه عمي دارس ببريطانيا ومصر ودائما الأصغر عمرا اقل ثقافة لأنه وكما هو معروف ان دبس الرُمان هو بالأصل (دبس رومان) زي ما كان مكتوب بالورقه… وهذا الشي غاب عن عقلي انا لأني جاهل و مش عارف هي الكلمه الصحيحه إسبغتي ولا سباغتي.

أتــرك تعليــق