نهاية أنس شجاع

old_womanبعز دين الصبح هديك المره وانا نازل على شغلي وقفتني حجه ماشاء الله بتفصل ما يقارب 30 واحد مثلي,والله ستر يومها ما دعستها يعني لما شافتني من بعيد وصلت لنص الشارع وهي بتلوح باديها وبتصيح وبتقول وقف يما وقف هي طبعا زي ما توقعت بدها اياني اوصلها للشارع الرئيسي بحكم انه المنطقه بعيده كثير والواحد بده اقل اشي يمشي ساعه الا ربع ليوصل للناس والحركه


. بهاللحظه طلع فوق راسي انوسين 2 واحد منهم احمر وحامل شوكه كبيره وبحكيلي ولك فككت منها هسه راح توكل راسك وراح تخليك تغير مسارك هاد غير التحقيق اللي راح تفتحلك اياه وقصص هبله الله الغني عنها يخوي,احكيلك؟! ادعسها ادعسها بلكي ريحت اهلها منها,اما الانوس الثاني كان لونه ابيض وعلى راسه في دوار اصفر وعنده جناحين صغار وبيحكيلي ,ولك يا انوس حرام عليك والله الحجه مسكينه ومقطوعه وبتخاف بعدين ربنا يغضب منك بخطيتها,يا أخي بلكي ربنا هيك كان مسخرك انت لتوخذها بطريقك ويالله بلكي كسبتلك دعوتين يفتحولك نفسك على هالصبح


اي مهو غصب عني راح اوقف صارت الحجه بنص الشارع ولازم اوقف خوف ما اضربها هسه والباص يروح فيها كتاف,,والحجه ماشاء الله خيرها فيها طبعا وقفت وهي اجت قبالي,واول شي سوته قالت السلام عليكم يما بعدين كان في سور عندها حاطه وراه شغله كبيره بتكون دايما مع الحجات,زي شرشف ملفوف على بعضه وجواته اغراض , راحت جابته بعدين رجعتلي وبتقول بتسمحلي يما؟؟


ههه بيني وبين حالي كلك اخلاق يا حجه, اه اه يا حجه اطلعي الله يقويكي وزي ما توقعلي انوس الاحمر.ايييه يما الله يكطع الخلفه ويومها قال والله وخلفنا وكبرنا هاظ ابني الله يهديه ما رظي يوصلني قال مشان سيارته خربانه وبده يوديها للكراج ..يروح الله ما بينساني .وانت شو اسمك يما؟ بطرف عيني مع ابتسامه مصطنعه..اه؟؟ انا؟ انس انس اسمي يا حجه


وانا خلصت كلمتي من هون! والحجه بلشت ترشقني دعاوي ونزلت فيي عن جنب وطرف ابتدائا من طفولتي وانتهائا بأولادي اللي لسه ما شفتهم الله ريتو يفتحها بوجهك ويسرلك امرك ويبعد عنك ولاد الحرام قلتلها ما عليكي يا حجه متل ابنك ولا يهمك,انا بدي اياها تسكت لانه الظاهر اني نشلتها من موقف صعب وبالنسبه الها مساعده ولا بالاحلام وخدلك عاد حجه كبيره ,مقطوعه ,محنكه, تحت لسانها في تيربو ,واجيت انا وطلعتها من المأزق يعني بصراحه دوشتني جد وفتحت براسي مجمع سرافيس ,وبكل كلمه كانت تحكيها كنت اتمنى تكون الكلمه
الاخيره هيك لوصلنا للمكان المطلوب


, وقف يما ,وقفنا ايوه وبعدين.فتحت الباب وهي نازله كمان ما وفرت الوقت لتوخد نفس,برضو دعاوي دعاوي بعديت فكرت وقلت بما انها الحجه دعتلي بكميه محترمه وانا استفدت منها كتير كتير ليش ما استفيد منها اكتر!! فعلى طول قاطعتها وقلتلها طيب دعوه لأبوي وأمي يا حجه سكتت و وقفت على الشارع وحملت شوالها ولما تأكدت انها وصلت بر الامان ,اتطلعت فيي وحكتلي ويا ريتها ما حكت
روح يا ربي يسعدهم و يرزقهم برك ويكفيهم شرك


O_o هه الكلمه كانت قويه وخربتها بأخرها, بس من يومها حرمت
.

24 thoughts on “نهاية أنس شجاع

  1. علووش says:

    هههههههههههههههههههههههههههههه والله حلوه ع هالصبح

    يالله الله بعينك ع هالي بتلاقيهم بطريقك بتعرف العجايز هدول لازم يقعدوا بالبيت ويصلوا ويصوموا بأخر كم يومين الهم بالحياه مش طول انهارهم من بيت هاد لبيت هداك والحق اصلا ع ولادها بس يا حرااااااااااام اجت فشه غلها فيك هههههههههههههههههه يعطيك العافيه دايما مواضيعك فزييييييييييييييعه وحلوه

  2. هههههههههههه دواوين
    عجبتني قصة أنوس الأحمر ، ذكرتني بتوم وجيري ^^
    يللا بتكون كسبت شوية حسنات يا زلمة ، إلا لو كنت ما خليت عليها دعاوي بعد ما نزلت :p

  3. ههههههههههه ….المسكينه مقروصه من ولادها شكلها فحبت تدعي لاهلك من قلبها باللي بقلبها 🙂

    بس الله يرضى عليك منيح اللي وصلتها, اي نعم حكيت للمليون اللي بتابعو مدونتك بس برضه راح تاخد الاجر ان شاء الله 🙂

  4. هههههههههه

    أحلى شي الدعوة اللي بالآخر 🙂

    ماخده راحتها الحجه بس معك؛ بالنادر وا تلاقي حجه ساكته يعني هاد شي من أعاجيب الزمن 🙂

  5. علووش الفزيعه
    ولك حرام عليكي شرشحتي الحجات,انا مش راح ارد عليكي هلأ بدي استناكي لتسيري حجه, والله يطعمك يوم تنقطعي وتحتاجي اللي يوصلك ,ونشوف عاد شو بدك تسوي
    وبعدين ماشالله عنك هههههههه
    خليكي خليكي شوي بس وراح نشوف 😛

  6. بلال
    هو يعني ما دعيت عليها بس بأكدلك ما خليت اشي من أثرها ,وحملتها شوال حسنات مع شوالها ال
    xxxx لارج
    😛
    وتوم وجيري بالنسبه اللي مو بحاجه لموقف مشان اتذكره
    متابع جيد
    ولاااااااااااااااوو 🙂

  7. ايوااااااااااااااا قصص طرمه
    هههههههههههه
    اول شي أكدتيلي انك بتعطي سعداني موز كل ما تيجي
    وهو بيحكيلي ما أكل ولا موزه من اسبوعين
    هي وحده
    😛
    تاني شي هو انا صحيح يعني بشفق عليهم وبحب اساعدهم الناس اللي زي هيك بس بعد التجربه حرمت ,يعني على الاقل ما بتراعي انو الدنيا الصبح والواحد بيكون عامل ميت مليون طوشه,بيفكرو الواحد رايق وما وراه غير يوصل هالعالم
    وزي ما قلت لبلال حملتها شوال الدعاوي اللي اعطتني اياه
    وبأكدلك كلو على الفاضي قبل ما اقول للميت مليون واحد 😛

  8. مياسي
    طيب اعطيني خبر انك جاي كان لبسنا السعدان بدله ورتبنا الكركبه شوي
    .
    .
    وانا شو اللي حارق راسي غير الدعوه اللي بالأخر؟؟
    صراحه صراحه لو قالتها واحنا بنص الطريق كان نزلتها هاد اذا قدرت
    بس انتي لو شفتي حجمها اللهم صلي على سيدنا محمد بالفعل حجم عائلي بتحملني انا والباص ولا بتنهز بشلن
    وفعلا مافي حجات بسيكتو لازم يعلقو على اي اشي ايش ما كان يكون .غريبه صح!!؟

  9. ههههههههه صح كل ما اجي بحزن عليه وبطعميه
    بس لا تخاف عليه يتخن, بخليه يهضّمهم منيح وانا بلولح فيه شمال و يمين 🙂

  10. عنجد انك ضحكتني وانا في قمة الملل

    الله يوفقك يما يا انوس

  11. انا مريض .. بس قرأت قصة الحجة … يالله عملت فيها خير … ودعوتها حلوة لانو لو بدك تقلب عليهم بيوم من الايام بغضبو عليك وازا غضبو عليك بتتعركس حياتك فهي دعتلك بإسلوب مبطن الله يسهل امرك … نايس قصة نايسة جميلة … بس انا مريض 🙁

  12. ههههههههههههههههههههههههههههه

    الحق عليك … كان رديت ع أنوس الاحمر ابوشوكة … مش كان اريحلك؟

    تقبل مروري

  13. مهو يا قصص طرمه ما بزبط هيك يا طخه يا اكسر مخه
    من الاخر سعداني اغلى ما أملك..وغير هيك معه جنسيه وجواز سفر وعضو اساسي بحماية الحيوان
    يعني لازم نعامله برفق شوي

  14. نانا انتي زياراتك بتنقاس بالسنوات الضوئيه
    احكيلك نكته؟؟
    مره واحد سكر صفحته فجاه واحد تاني ضل يحكيلو ولك افتحها وارجع ولك بعدين معك
    اخر اشي الي ضل يحكي افتح صفحتك غاااب وبطل يبين بعد ما صاحبه فتح الصفحه تبعته
    وعاشو الامير والاميره بسعاده وهناء
    🙂
    ما عاش النكد والملل
    اضحكي وبسسسسسسسسسس
    🙂

  15. براء
    سلامتك من الهسهس
    😛
    اه يا ام القواعد عندك كمن خطأ
    وراح اعطيكي تلميح وبس تيجي صححيهم
    1- مريض
    2-نايسا
    زي ما قلتلك بالاول
    سلامتك من الهسهس

  16. aMahrouQ

    ما بتسمع الشاعر بقول غلطه وندمان عليها 😛
    س الواحد بيتعلم من كيسه
    سؤال: طعميت سعداني موووزه؟؟

  17. اكيد , الواحد ما بتعلم غير من كيسو

  18. إباء فلسطين says:

    اضحك الله سنك..

    اضحك مع الحبيب المصطفى صلى الله عليه وسلم

    http://www.jzaab.com/articles-action-show-id-425.htm

    اختبر نفسك … هل انت عصبي ام لا ؟؟؟

    http://www.jzaab.com/articles-action-show-id-466.htm

    الخرابيش اللارادية لها دلالات وتفسير .. اكتشف شخصيتك

    http://www.jzaab.com/articles-action-show-id-333.htm

  19. حرااااام عليك يعني الحق عليها الي دعتلك والله انو الواحد لازم ما يكون متكبر ولازم على شانها كبيرة بالسن تحترمها شوي 😕 وبلاش مصخرة………….

  20. بلاش مصخره؟؟؟
    ليش شو سويتلها لحتى قللت من احترامها او بشو تكبرت عليها!!؟؟
    مش فاهم اشي

  21. ولا اشي ابدا بس كل هاد الي كتبته ومو مصخرة بكفي الصورة الي حاطتها!!!!!!!!!!!!! 🙁

  22. رأيك الشخصي
    🙂
    ولو بدي ادقق على كل تعليق كان سكرت الموقع من زمان
    بس انا مسسسسسستمر
    😉
    اشكر متابعتك
    واهلا وسهلا بأي وقت وأي تعليق بغض النظر عن موود المعلق

  23. سووووووووري كتييير يعني بس فعلا هاد رأيي على كلن الموقع كتييير حلو يعطيك العافية 😛 😛 😛

Leave a Reply

Your email address will not be published.