ألسر

kittenlookingintomirrorseeinglion

what matters most is how you see yourself


الجمعه هو اليوم الوحيد اللي بختلط من خلاله بعالمي الحقيقي وبقدر اتواصل مع الاصدقاء بث حي ومباشر بدل النت والتلفونات وأكيد ما عندي وقت بغير هاليوم ,حتى الخميس يا دوب برجع من الشغل هلكان وعندي واحد من الخيارات


1–      يا أما بتحمم

2-      او بتغدى

3-      او بنام


ومن الصعب اجمع خيارين مع بعض الا ما ندر,يعني هيك هيك ما عندي وقت لنفسي أو لغيري, واشي أكيد الشغل بالأقسام الأخرى للمدونه ماخد كتير من وقتي فهاد الشي شبه قطعني عن الكل وبصراحه دايما خجلان من الناس ودايما بلبس التقصير لتلفوني اللي بشحنه كل 8 سنوات مره (زودتها شوي بس مش كذب) لكن اليوم قصتي مختلفه وغريبه لما التقيت بصديق كان في ما مضى من أعز الناس على قلبي ولأن في أحتمال يمر هون لعندي بقول وما زال لكن الحياه تلاهي وأنا مسامحه على تقصيره لأني اليوم بالذات اقتنعت بالمبدأ اللي ماشي عليه وشو سبب تقصيره بحقنا كشباب عاشو مع بعضهم مثل الأخوان بطبيعة الحال الفضفضه ما بتصلح الا لأنسان قريب منك وبيعرف شو هو تفكيرك بدأت احكي واشكي من هالعالم والدنيا المقرفه وأنواع واشكال من الأهات  والتعاسه , من المصاعب اللي بتواجهني بالشغل لدراستي لمخي الصعب ..

فحكالي يا أنس انا بعرف انك ماكل (هوى!!) ودايما مشلول أملك ومش عارف تتأقلم مع محيطك وبصريح العباره انت دايما بتفكر بسلبيه, يعني ليش ما تحاول تغير ظروفك لتكون أكثر ملائمة مع تفكيرك.

بصراحه انا مش تبع هيك نقاشات وكنت اقاطعه بكل كلمتين بيحكيهم لكنه أستمر وهو يحكي ويحكي وبالاخر ما لقيت حالي الا اني مندمج تماما مع كلامه وشوي شوي لقيت حالي موافق على كل كلمه بيحكيها ,فكان يشرحلي عن برنامج وثائقي اسمه (ذا سيكرت) ويجيبلي أمثله عن عالم كان عندها مشاكل وضغوطات بالشغل ومع الأهل وكيف قدرت تغير الظروف نفسها لتخليها تتماشى مع عقليتها مش العكس على ما هو متعارف عليه, أن الواحد يحاول يغير تفكيره ليتأقلم مع ظروفه الصعبه!! لا لا كل اللي عليك تعمله انك تكون ايجابي من داخلك بالأول وانك تأمن بأن اللي بتسويه صح ميه بالميه وحتى لو كان خطأ أو برأي الاخرين خطأ,فالغبي هو اللي بياخد الدنيا بالعباطه وبضل يشتغل بتردد وخوف من أن النتائج ما تكون زي ما هو بده اياها ,أو زي ما الناس بدها اياها.

بعباره أخرى طقققققققققققع للكل وكبر من قدرك وحاول حط الأحترام والتواضع على جنب (طبعا ببعض المواقف) وحاول تشعر بأنك ركن أساسي بعالمك لأنك اذا قدرت تغير رؤيتك للعالم لحاله راح يتغير معك وراح يمشي زي ما أنت بدك أياه ,طبعا التغير يبدأ من الداخل وتلقائيا راح تشوف تغيير ملموس وواضح قدام عيونك بالتالي سلسله من النجاح الغير متوقع ,وهاد الي خلى صديقنا يقصر بحقنا, نجاح بظهر نجاح وشغل مع نتائج مرضيه بالنسبه اله, وقناعه داخليه صنعها بنفسه بأن تفوقه راح يكون بأنشغاله برفاهية نفسه وحمايتها من الأجواء السلبيه .

وهو وعدني يجيبلي السيدي مشان أحضره, وان شاء الله بس اتعمق بالفكره أكثر راح أكتب عنها أكثر..

لكن الأولى أن يذكر هو حديث الرسول صلى الله عليه وسلم لما قال(تفاءلوا بالخير تجدوه) فسبحان الله علم كامل مختصر بثلاث كلمات من أشرف الكلام وأصدقه بعد كتاب الله.

14 thoughts on “ألسر

  1. شكلك بتحكي عن لطفي
    انوس عيش حياتك و انسا الباقي
    و انت عارف صارلي قديش ما طشيت بجوز شهر كامل مش قادر اطلع من المحل
    بعين الله

    مش منك من الي براسك

  2. وانا من رأي صاحبك عيش حياتك ولا تفكر في اشياء مش وقتها دير بالك على حالك وحاول ترفه عن حالك صحقني اليوم اللي بيروح محسوب عليك

  3. فكره حلوه

    يا ريت أقدر أستفيد منها أنا كمان
    لأنو هسه عندي شحنات سلبيه تجاه حالي والحياه شيء مش طبيعي!!!

    حاسه حالي فاهمه وضعك كتير مزبوط جد!!!

    بس لما تقرر انك تتغير-وظروفك تطاوعك- بتصير الحياه فعلا أحسن:)

  4. كتير الواحد بتمر عليه ايام بتأزم معه و بحس ان كل الابواب مسكره قدامه وكل الناس مش فاهمته و بحس حاله بكره كل الناس و اولهم نفسه

    بس دايما دايما هالايام بتصير ذكرى وتجربه مفيده النا و لشخصيتنا.

    اهم اشي بهالدوامه كلها انك ما تنسى حالك, لان مهما اللي حواليك فرحو معك او زعلو عليك ساعه, انت بس لحالك اللي راح تكمل هاليوم

    و زي ما حكيت احسن اشي تتبع “تفاءلوا بالخير تجدوه”
    وربنا يكتبلك كل الخير

  5. فراس
    ههه لا يا سيدي ما بحكي عن لطفي انا بحكي عن بني أدم طبيعي وبشري ميه بالميه
    🙂
    وبدك الصحيح ؟! انت اللي حابس حالك هالحبسه يعني لو ما ترجيتك وضليتني وراك مشان نروح على (نم نم)ههه كان ما طلعت من الأصل ,وهيك طلعت وما نقص عليك اشي 🙂
    مش منك من لطفي 😛

  6. سوزان
    أنا لو بأيدي ما بضيع ولا ربع الربع من الثانيه وبحاول استمتع فيه بس أنا راح اشتغل وأفهم الفكره أكتر واكيد راح أكون بأفضل حال 🙂
    شكرا الك سوزان

  7. مياسي
    شايفه بمجرد ما تقولي حاسه بوجود شحنات سلبيه تجاه نفسي؟! انتي عمالك تزيدي هالشحنات اكتر وأكتر
    يعني هي الفكره بسيطه ,بتسمعي باللي كذب كذبه وصدقها؟ هاد مبدأ الفكره,تكذبي على حالك انك أحسن من هيك وضلك مداومه عليها ,بالأخر راح تشوفي التغير! بس شغلة ثقه وايمان باللي بتسويه من دون تردد أو شك بأن النتيجه راح تكون غير مرضيه
    بوعدك ان شاء الله أنزل السيدي هون مشان يستفيدو الكل
    ولا يهمك ميسو 🙂

  8. whisper
    صح بس الأزمه بطريقه ما ممكن نحولها لمتعه!! بتصدقي؟
    ومعروف البني أدم دائما بحب يتذكر المواقف الممتعه وبيحاول يتجنب المواقف الصعبه اللي مر فيها بحياته
    فأنتي بمجرد ما حولتي الصعب لمتعه, انتي هيك بتستفيدي أكثر من تجربتك! يمكن كلامي مش واضح ومبين على شكل طلاسم ورموز فرعونيه
    بس بتعرفي لو حد يشرحلك الفكره راح تقتنعي فيها
    وأكيد مافي مرجع ولا ملاذ غير كتاب الله وسنة رسوله عليه الصلاة والسلام
    وعن قريب راح أمر عليكي واضحك على القصص الطرمه 🙂 بس أخلص هالكمن شغله
    شكرا الك

  9. قبل شي سنه مريت بازمه كتير صعبه والحمد لله

    كانت بنت خالتي تنصحني وتحكيلي
    اول اشي ابعدي عن السلبيين وكوني ايجابيه بكل اشي

    وبس تدعي ربنا يفرجها عليكي ضلك على يقين بان ربنا راح يسعدك
    والحمد لله هاد اللي عملته … ما بنكر اني بس اتزكر هديك الفتره الا ما يكون في سمه بدن بس دايما بتنتهي بابتسامه اذا ما كانت على موقف صار بوقتها بكون على القليله انها فتره وانتهت 🙂

  10. الحمد لله انها مرت على خير,وبالفعل هو اليقين والايمان من الداخل هو اللي بيغير العالم بعيونا وبحول التعاسه لسعاده,حتى أن الانسان المسلم يحتاج للايمان بالله والثقه التامه ليتوفق بكل أموره ويكون أفضل على الدوام
    وشكرا الك مرره تانيه 🙂

  11. الاخت علووووش says:

    الحمد لله انه في ناس غيرك يا انس لاني انا كمان كنت احس انه الاتجاه السلبي عندك طاغي على الايجابي بس منيح انك صرت تعطي بال للناحيه الايجابيه وتفكر فيها ولو ضليت على السلبيه ما رح تتوفق بحياتك لانه الحياه وسطيه بين الايجابيه والسلبيه صح
    الحمد لله انا من الناس المتفائلين واسأل الله ان تصبح من المتفائلين وذوي الطموحات الايجابيه
    وصدق الرسول الحبييب تفائلوا بالخير تجدوه

  12. علوش انتي كلك تفائل 🙂 وما حدا بنكد عليكي ماشاء الله عليكي 😛

  13. بالسر والجهر – جديد المنشد ابراهيم الدردساوي 2009

    http://www.jzaab.com/voices-action-show-id-335.htm

    الحربايه العجيبه_سبحان من ابدع خلقها شاهدها بالفيديو

    http://www.jzaab.com/videos-action-show-id-144.htm

    نشيد أردن يا وطني .. فرقة مودة

    http://www.jzaab.com/voices-action-show-id-319.htm

  14. مرحبا انس
    انا حضرت الفيلم و بصراحة ما دخل راسي وصنفته مع الافلام اللي بحضرها عشان انام بسرعة
    مش كفاية انه الواحد يركز على فكرة او هدف حتى يتحقق لازم الواحد يبذل جهد ليوصل لهدفه، هاد رأيي

Leave a Reply

Your email address will not be published.