مــــعجنــات

اليوم الوالد الله يديمه اجا عبالو يفطر معجنات ,وبالعاده لما يكون الشغل متحرك منفطر متأخرين يعني بحدود الـ2 ونص لغاية الــ4رحت وواثق من حالي انو مش معقول الناس تكون دابه على هالمعجنات يعني خلص موعد الفطور وَدع ولازم هسه يكون الغدا, فبلاقي دوري هو اللي واقف وبستناني ما علي غير اوصي وكان الله بالسر عليم.. فش دقيقتين وصرت موصي على 6 قطعوعلى اساس عمو الخباز بخبز فيهم!!شوي ولا هي داخله وحده وبدون ما تسلم! و بدت تطول من البترينا قطع معجنات وتقول بينها وبين حالها “ام عبدالله بدها 3 سبانخ و2 لحمه, ام سعيد بدها بليره كبه , سوسو تئبر ألبي بتموت بالبيتزا” وعلى هالحاله لصار عندها كومة معجنات!!كفيلة بفك ازمة المجاعات بالعالم كله

وأنا مالي وهي مالها, عم بتطلع فيها بمهزئه وكاني بجاكرها انا كل اللي طالبو 6 قطع هيهيهيهووو هسه باخدهم وبضلني مشدر عالمحل ..شف شف المسكينه راح تنلطع ساعه مشان ام عبدالله وسوسو تئبر ألبها
قلت فكني منها خليني اطلع ادخن سيجاره وبرجع باخد طلبي, وكل شوي بفوت عالمحل وبسأل الزلمه “شو صار بالطلب يمعلم”عسريع بجاوبني يالله يالله دقيقتين. قلنا دقيقتين لا حول ولا منستنى شو ورانا ,..الدقيقتين صارو 4 والاربعه خلفت 8 و10 و20!!ول شو هي الساعه كاينا خم أرانب؟!! يعني مضلش فيها بدي اعرف شو صار بالمنسف؟؟! انا داخل عالمحل وخالتو الست طالعه ..زي ما تقول تقالبنا وجه بوجه ,لأ وطايره ومستعجله ومحمله بيدها المعونات المتلتله… ولا اشي فتت عالخباز وبدي انعن الكائنات خلص فش مجال انا كل اللي طالبو 6 قطع وهي كنست المحل باللي فيه…كيف طيب تمشي قبلي؟حاولت بالبدايه اكون لطيف واحكي بكل احترام ,بس المشكله الاحترام ما بمشي مع البقر ,انا قاعد بحكي معو وهو متبع للست المحلقه من السايد اليمين قطعها الشارع لوصلها عالسايد التاني وضلو ماخدها بعيونو لوصلها لحد ابعد نقطه بقدر يتبعلها عليها ,,..هوووون خلص! انفجر شرش الاحترام عندي, ويا رداحه من وين بلادك ,هيك لهيك للي بشتري من عندك للنسونجيه اللي مثلك لكل النسوان يعني فايت اشتري بليره لكني سمعتو كلام بألف ليره …..وسحيت حالي وضليتني طالع لحتى وصلت على بعد اربع محلات, ولا هو العامل المصري عندو لاحقني وبنادي علي وبقول”رايح فين والنبي يا باشا دنت طلبك جاهز من ربع ساعه” قلت بيني وبين حالي كبري عقلكي يا عمري وخود الطلب ولا ترجع لابوك بدون الاكلات ,الزلمه الله يعطيه العافيه انهلك اليوم,,.. اخدت الاكلات وزتيت حقهم بوجه الزلمه ورحت عالمحل
لما وصلت صارت مناقره بسيطه ليش تأخرت وعلى شو ومن هالحكي اخر اشي طلنا الاكل وبدنا نقول بسم الله,,. ولا هو الطلب مش طلبي!! كان بالجاط مصفت 5 قطع بيتزا بس! صفنت بحبات البيتزا وعم اتطلع على ابوي ومندمج مع الفلم عالاخر وأنا بيني وبين حالي بقول

 

“بيتزا؟!!ولك تئبري ألبي يا سوسو”

7 thoughts on “مــــعجنــات

  1. بيتزا؟!!ولك تئبري ألبي يا سوسو”
    hahaha like dat.

  2. يا زلمة لازم تجوعني على هالصبح ؟
    صرلي زمان ما أكلت معجنات .. زكرتني فيها
    😛

    على كل حال صحتين .. سواء معجنات أو بيتزا
    ^^

  3. lost within says:

    sa7tein 3al pizza 😉

  4. hamede : enta like dat.
    bs 2na la2 😛

    belal: صح هيك انا كاتب الاسم؟
    ما بدك اياها والله ..اذا بدك تصف عالدور انسى من هلأ بحكيلك
    او بتروح على محل اللي ببيعو فيو نسوان مشان يمشوك بسرعه
    صحتين على قلبك.. ما قلتلي متى بدك ارجعلك الينات ؟؟؟
    😛

    lost: thank u sis ;-P

  5. إبـراهيم ... معـايــا says:

    هههههههههههههههه

    حلو جوي

    أنا مبسوط إني عثرت/تعثرت بمدون مش مصري 🙂

    منور البلوجز بوت

    خالص تحياتي

    وصحتين وعافية يا سيدي

  6. هلا ابرايهم
    بس ما اكون عورتك لما تعثرت
    يا هلا حبيب على راسي انت وأهل مصر
    واحد واحد مش كلكم مره وحده
    🙂

  7. بالنسبة لاسمي أنا بكتبه هيك
    Bilal

    والينات مبروكين عليك .. تصرفهم بالهنا
    :p

Leave a Reply

Your email address will not be published.