عام دراسي جديد

بالعاده بتكون فترة الصبح فترة هدوء وروقان والكل بتمنى من الله يطلع من البيت وهو اقل مافيها مبسوط لانو لاقى الفطور جاهز وبستناه ,والجرابات ملفوفات بالدرج وفش داعي لتنكت الدنيا لتطولك جوز متطابقات بالشكل واللون واللبس جاهز مجهز نضيف ومكوي وعال العال. والأهم تسمع كلام حلو بنبره هاديه بتودعك على باب البيت قبل ما تطلع

… مقطع زغير لحيوان مجهول المكونات صحاني عالسبعه ونص الصبح

هي اليوم الطابور تأخرنا فيه وسمحنالكم لأنو أول يوم دوام .أما بكره قسما بالله العظيم اللي بيجيني متأخر لأحط فيه قتل وأجيب ولي أمره يشوفله تانيه تضبه..انا هون عندي نظام عندي طلاب مش زريبة حيوانات!! ويكون بعلم جميع ابنائنا الطلبة الرواح بكون عالحصة السادسه, كمان لأنو اول يوم بكره فش رواح قبل السابعه فاهمني انت واياه؟؟!! اما بس خليني اشوف طالب بحاول يتسرب من فوق السور شوفو كيف بدي اخلي منه عبرة لجميع الطلاب وغير أخلي كل سنه جاي تحكي عنو..!! لانكم ما بتيجو غير هيك لازم الواحد يضل داير ورى ظهوركم بالعصاي فحسكم عينكم اسمع حدا فيكم معارض… النقطه الأهم الزي المدرسي بدك تلنزم فيه وتلبسو حتى لو كانت ريحتو طالعه اللي ابوه معوش يشتريلو زي تاني..ما يجي عالمدرسه لحد ما يغسلو وخلوني اشوف واحد لابس غير اللون الأزرق على طول من محلي وانا واقف على الأذاعه بطولو وبشرشحه قدام جميع الطلاب. وبالنسبه للكتب . كتبك معك وملازماتك وممنوع تضيع كتاب وا تبدل انت وزميلك ..اخر السنه كتاب ممزوع كتاب ضايع بتدفع حقو فاهمين علي كيف؟؟

الجل ممنوع الأساور والسناسيل ممنوعه والخلوي ممنوع الشجار كمان ممنوع, احنا هون كبار واعين وعارفين شو الغلط..؟؟

واتمنى لجميع الطلاب ولزملائي المعلمين عام دراسي جديد مفعم بالنشاط والحيويه

تششششششششششششششششش <<<<< تعني زقفه جماعيه

,,,,,,,,,,……!!! موطنيييييييي موطنيييييي

في صباح اليوم التالي طالع على الشغل من الصبح وحاط عالراديو البرنامج الزنخ تبع الوكيل..,, مش مشني بسمعلو لأ لانو الراديو جديد وبديش العب فيو بلاش اخرب الدنيا. المهم مواطن شريف بتصل مع الوكيل وعم يشكي من المدرسه الحكوميه الكائنه بمنقة الأغوار الشماليه..انها خاليه من الطلاب والحصيله العامه 9 طلاب ذكور وبنت واحده فقط

طيب يالله شو المشكله؟؟!! ليش هيك طلابنا بكرهو المدارس .عاد الضرب ممنوع فيها والحق دايما مع الطالب ويحق لولي امر الطالب انو يرفع شكوى على احد المعلمين اذا حصل منو تقصير في التدريس واهمل الطلاب.. غير هيك عنا مختبرات حاسوب وخطه تدريسيه متطورة مستوردينها من بره واساليب معاصرة في التدريس
he he he he xD

وبقولو

قم للمعلم وفيه التبجيلا

كاد المعلم ان يكون رسولا

……………

وأنا بقول

((لو كنت فظا غليظ القلب لانفضوا من حولك))

طبعا هاي الايه كانت موجهه للرسول

اذن كيف راح تكون لواحد لسه على حفة يكون رسول؟؟؟

This Post Has 0 Comments

  1. eNAS

    اما مدير مدرسه
    حنون ورايق
    يا عيني
    يا هيك التربايه يا إما بلى:P

    بس بتعرف انس… ولا كان احلى من اول يوم دراسي… والشنته الجديده ,والمريول اللي بلمع…..والله غير شكل

    بس بدك الصراحه….الاولاد هيك بدهم(مدارس البنات مختلف الحكي
    )
    الا قله طبعا

    ومبارك العام الدراسي الجديد
    مع موجة الحر هاي …والاسعار
    ورمضان جاي…ويا سلاااام

  2. lost within

    ana besara7 madrasti awal yom kanat ma2sa w 5ososi 3al bnat el jdad ,,, b saf 11 eja 3al sho3bti 7awali 6-7 bnat jdad ele kamalat
    ma3na 1 bas ! el bagi ma t7amalo el modera !
    y3ni zay el zalameh tb3ak 3ala al3an l2nha mdraset banat !

  3. مياسي

    تعرف اني ضحكت من قلبي و أنا بقرأ

    عن جد تحشيش؛ أنا مدرسة البنات قريبه ع بيتنا شوي؛ كل يوم الصبح كنت أسمع الطابور و النشيد الوطني و أصحى عليهم و ما اعرف ارجع انام

    مين حكى انو مدارس البنات أحسن؟؟ بالعكس في مديرات كتير شديدات لدرجة انو بتضل طول الدوام تشيك ع اللبس و المريول و كل شي

    بين و بينك؛ جيل الأيام هاي بيعل:)

  4. Biraru

    الله يعينك .. لسا امبارح كنت بحكي مع صاحبي عن هالموضوع انو ليش الطلاب بيهربوا من المدرسة
    ذكرتني لما كنا بالثانوية كان في طلاب يكتفوا من الدوام عالفرصة وبيبدأ التشليف والتسلق
    :p

  5. lost within

    HellOoooOOOoo man !
    bs bt2akad enu u r still alive =)
    inshalla kolo tamam at ur end ? 🙂

  6. العبيط

    مرحبا
    انا رجعت بعد شهرين انقطاع… لظروف قاهرة و اكتئابية بحتة

    و اسمحولي اكون الشريك المخالف هون … انو شو بدكم المدير يعمل
    يعني يحكيلهم يا حبايبي يا ولادي ما بيصير هيك
    ما حدا رح يسمعلوا … خصوصا انو واحد مش مربى كويس رح يخرب عشرة مربيين

    الاصل انو الطالب يحب المدرسة
    و بالمشرمحي الغلط عنا بالنظام التعليمي كله و بالاسرة نفسها

    يعني فكركم ليش الامهات بيكونوا يستنوا العطلة تخلص . مش عشان ينضبوا الاولاد بالمدرسة و يخلصوا منهم

    و الطالب ما بيحب المدرسة لأنو مش ممتعة
    و المدرس ما بيحبها لأنها غلبة بدون راتب

    و انا شكلي مستنفر اليوم بعد شهرين انقطاع

  7. anas

    نوسا: ايش هم الولاد بقر بلا مؤاخذه؟؟
    😛
    بتعرفي لو في شي بتحسر عليه ايام المدرسه هو اني كنت احترم الاساتذه وعلى طول اومارهم مطاعه
    والله كان المفروض روضناهم متل حيوانات البراري
    بس مش مشكله البركه بالجيل القادم

    lost:يعني شوفي كيف سبب العقده واضح دايما بتكون المديره او المعلمه عاملين وحوش بالمدرسه ومن اول يوم بتبلش البهادل والشرشحه..مبحكيلك لازم الاستاذ او المعلمه يندعس عليهم مشان يفهمو انو احنا بشر زي ما هم ولادهم
    ووو شكرا كتير لسؤالك 🙂
    انا تمام انتي كيفك؟؟

    ميسو : وانا عندي نفس الشي المدرسه قريبه كتير علينا
    يعني بطلع الطالب بعد ما الاستاذ مسح فيه المدرسه مشان يلقطو حدا من الجيران على شجرة اسكادنيا ويكمل عليه
    هم بعلو اه انا معك
    بس كمان هم مش حيوانات

  8. 36ooor

    bira ru (blal): اول اشي انت كيفك زمان عنك 🙂
    عاد بتعرف انا لما كنت بالمدرسه الفرصه هي عبارة عن 5 دقايق داخل الصف والدوام الرسمي بالمنتزه خارج سور المدرسه
    والقضيه واضحه طالما اللي بدرسونا بعاملونا هيك لازم في تشليف

    عبيط: يزلمه اهلين شو وين كاين سلامات سمعنا مكسور؟؟ يالله ريتو الف سلامه وتقوم بالصحه
    هلأ مش غريبه عليك تكون الشريك المخالف هيك تعودنا 😛
    شوف علي انا بصراحه بكره كل المعلمين ولا بحترم واحد فيهم حتى لدرجه ابن عمتي اللي كان يدرسني ومربي صفي ما بطيقو
    انا بالبيت تربيت على اني احترم الاستاذ وايش ما يقول على راسي وخلص هيك لازم يكون في نوع من العلاقة الرسميه بيني وبينو
    بس لاحظت انو هاد النوع من الطلاب هو اللي بعاملوه بالطريقه الوحشيه هاي وبفشو غلهم كلياتو فيهم ..اما بتلاحظ الطالب النمرود بتلاقي الاستاذ بحكيلو يا زلمة مستعد اعبد سمواتك بس اقعد عاقل ف شوف كيف انو المشكله من المعلم نفسه مش من الطالب وصدقني هاد الكلام من تجربه وانا لهلأ بتحسر على كل كلمه مؤدبه وجهتها لمعلم بحياتي
    بس برضو بالعاشر فجرت حقدي باستاذ الدين 😛

  9. سوزان

    تعرف خليتني أضحك وذكرتني بايام الدراسه والبياخات اللي كنا نعملها والله أيام

اكتب تعليق على الموضوع ^__^