حركة إصلاح

جاي اقول سنحك على سنحو فظحتونا بين العرب . ولكو احنا الي هو احنا الفيصلاويه والوحداتيه ما عملنا الي عملتوه , ولا عمرو صار ولا حتى راح يصير ..عنا المشاكل بس أول عشر دقايق من المباره بين الجمهورين وبعد المباراه لعيبة الفريقين بيقعدو يسكرو سوا والجمهورين شوية طرطقه وتعنفص على بعضهم ,, هوووب ولا هي الدوريه جاي ولا بتلاقي ابن ابوه واقف بشالراع على رجليه ..

أي سبعك انت وهو على هيك وجه ما جبتولنا غير المصايب والحكي , هو انا بديش اقول اتذكرو غزه ولا بدي اقول قضيه فلسطينيه ولا قضيه صوماليه لانه الحكي هاد صار مبرمج على لسان كل واحد اجتو نزعة شرف بوقت متكندر مثل الوقت الحالي..

بس جاي اقول ولكو انتو شعبين اكلتو سخام البين وانتعن ابو سنسفيل حمواتكو وهيكم واقفين على رجليكم ولا هزكم ريح !

هسه جايينلي على شقفة فطبل تعملو مذابح ؟ أي ريتو انفزر هالفطبل بعز وقت المباراه مشان تتعلمو كيف تلعبو انتا واياه سوا من غير ما يطلع صوتكم.

يا اخي دخلنا على هالمنتدى نشوفلنا شغله حلوه نضحك عليها لقينا ميدو المصري بقول الله نصرنا على الجزائريين مشان قلة ادبهم ولقينا الي مش  عارف شو اسمها الجزائريه بتقول عن المصريين مجرمين وبلطجيه والله نصرنا عليهم مشان هيك.

بس بدي اسأل ميدو والجزائريه كم ركعه صليتو ودعيتو وقلتو يا رب انصرنا على خصمنا (عدونا) كم يوم صمت وتعبدت وانت بتسأل ربنا النصر والثبات؟

والله الحق مش عليكم الحق على الي بيتفرج على مبارايات وبتابع هيك مسخره مثلك ومثلها

وهي انا قلت الي عندي حبكم تتصافو وتبوسو شوارب بعض هيو حبكم

ما حبكم الله ريتو لا حبيتو ولا تنحبو

وقال مفكرين الجمهور الاردني مصاريع قال.

This Post Has 6 Comments

  1. FOX

    المبارة قلبت حرب بين البلدين المفروض انهم اخوان و ساعدو بعض في الحرب مع اسرائيل و مع فرنسا بس طبعا بدون تحميل جمايل على بعض لانو انا شايف المصرين بحلو جميلة للجزائر و العكس كمان بحملو جميلة لانهم حاربو مع مصر في حرب رمضان
    و المشكلة انو الاعلام المصري زاد الطين بلة و خصوصا المسقع البارد عمرو اديب

  2. whisper

    شو بدك تعمل يا انس
    المشكله ان الروس الكبيره هي اللي بتحكي و ببتوعد

    صار مشاكل على مستوى فئه من الناس المفروض هالعالم اللي مفروض عاقلين يلمو الموضوع و يهدّو العالم

    الله يهدي الجميع

  3. Farah

    hello 🙂
    awwal marra bshoof el blog bs bhannek 🙂
    umm 3andak osloob sareeeee7 bel ta3beer hehe
    walla kol el denya ntaqdat hal mawqef el msh tabee3i mn el jehaten !! bs .. 3atabak 3alli fahem !! wella 3alli far2a ma3o !!
    mu2amara o she bewatti el ras !! maktoob 3lena maktoob !!
    BEST WISHES 🙂

  4. anOsyatE

    فراس احكي وكثر لو انا ولا غيري حركت شعره انت حركت
    لا تتعب حالك يا صاحبي الموضوع اصغر من الاهميه الي معطينو اياها احنا
    وهاي هي شيمنا واخلاقنا
    دايني خمس ليرات بوقف معك ما بتدايني بقلب عليك
    ولو كنت موقف معك بزمناتي بحمل أهلك جميله

  5. anOsyatE

    مهي المشكله من الروس الكبيره من الاصل ,لو كانو عاقلين ما صار الي صار
    والفئه هاي الصغيره كان ممكن بشوبة دبسات لموهم ببيوتهم بس هم مو مصدقين على الله وايمتى تصير شغله يلتهو فيها
    الله يهدي الجميع
    او
    يوخد الجميع

  6. anOsyatE

    اهلا وسهلا بأول زياره وبتمنى ما تكون اخر زياره كمان
    🙂
    هو انا أحكي بصراحه .. بيني وبين كرة القدم ما بين ابليس والجنه
    يعني انا التاني مو فارقه معي مين فاز ولا مين خسر مهينا احنا بالاردن الناس بتضرب فينا المثل بالهمجيه وقلة العقل بالنسبه لمشجعي كرة القدم
    بس والله بحياتها ما وصلت للقتل والدم!
    وعلى قولتك هاي مؤامره الموضوع أكبر من شقفة فطبل بين لعيبة البلدين
    وأهلا وسهلا كمان مره
    0 <<< حبة معمول 🙂

اكتب تعليق على الموضوع ^__^