!! شهيدة الحجاب,شعار اخر

اكيد انا ضد اللي صار للأخت المحجبه (د.مروه الشرابيني) وعندي نفس الموقف من “الصريخ والعياط واللطم ” احتجاجا على مقتلها على ايد الملحد سود الله وجهه.

وانا احترم كل اخت مسلمه ملتزمه بحجابها عن قناعه مش اللهم تقليد شعبي برأي كثير من العائلات النص ملتزمه..لكن بصراحه استغرب ان الحجاب انضم لقائمه (شعارات ولا شيئ سواها)

طيب شو شعارات ولا شيئ سواها؟؟

انس بدأ يألف من عنده!!. اها عم بألف من عندي شعارات ولا شيئ سواها تصنيف اخترعته انا وهو عنوان لقائمه من الأمور المهمه بالنسبه النا كمسلمين جردناها من قيمتها الحقيقيه واخذنا منها القشره الخارجيه الظاهره وصرنا نطالب بأحترامها من دون الألتفات لوسائل فعليه صارمه تفرض احترامها منا احنا بالأول وثانيا من الغير..

hejab-mask

هسه شو هو الحجاب؟

كتلة قماش ملفوفه على راس المخلوقه مع الحرص الشديد على عدم ظهور أي شعره شارده وان ظهرت يجب قصها.! مع بلوزه بودي وبنطلون جينز ممكن لو شدت على حالها وقالت احم..راحت البنت فضيحه لأن البنطلون مش متحمل الكتله المحشوره فيه..!

او الحجاب عبايه محتشمه مع تفصيل بسيط جدا..يعني لا تزودهاش برضو بني ادمات احنا! مع شقفه قماش واصله لنص الراس .مشان الغره اللي من قدام عليها سبراي مثبت ,يعني هو انا كشفت كل شعري؟؟ غلط اهون من غلط..!

كمان لا تزودهاش

hejab-ops

او شو هو الحجاب..جلباب فضفاض ساتر غير مفصل مع تغطيه كامله للشعر. لكن مو مشكله لو (الجروب) حب نطلع نشرب كابتشينو على شارع لأنه الشباب كتير نايس مع الصبايا وما عندهم حركات اللف والدوران..

يعني من الاخر اللي بدي افهمه هل يكفي ان يكون الحجاب هو حجب الجسد بس؟

يعني بمجرد ان الأخت غطت جميع معالم جسدها هيك هي حققت الغايه المطلوبه في حكمة فرض الحجاب؟

طبعا لأ..المشكله بالموضه الجديده اللي اسمها الاعتدال في الدين..وكأنه الدين نزل على ثلاث نسخ .متشدد ومعتدل وغير مبالي؟؟؟؟!!!

الدين واحد والتشريع واحد..يعني لو قلنا يا جماعة الخير الحرص على عدم الأختلاط واحد من توابع الحجاب..بتحكيلك لأ انت ليش عندك مخ بدائي لك روح تضرب زيك زي البابا..!

طيب يا جماعه بيحكيلك مافي اشي اسمه زماله بالشغل او بالجامعه ولكل طريق في ممهدات يعني انتي محجبه وحريصه وريقك نشف قد ما بزقتي على بالشارع وعلى التلفون . بتقلك لأ انت ما بتعرفني ما حدا بيسترجي يغلط معي بكلمه.. بعدين انا محجبه وما بينخاف علي!!

hejab-lol

وهي مش عارفه انه الشباب بهالايام عم يتشعتلو مشان الزيجه وعلى يا رب صبرنا ويا رب بدنا نتجوز..

والأخت (الحره العصريه) كلشي عندها فري يعني بسمعك صوتي وبطلع معك ومنروح ومنيجي منضحك..ممكن نتمايل على بعض بس اوعى (تتوائح معي) وتحكيلي بدي اشوف شعرك كيف…

بليز خلينا فرندات .كلشي ولا الحجاب

جد حاب أعرف شو مفهوم الحجاب بالنسبه النا حتى صار في شهيدات عم يموتو كرماله؟؟

وليش لحتى يسير مجرد شعار بس من غير الألتزام بالشروط الأساسيه للحجاب ؟

فكان ابوي دائما يحكي لو شفنا وحده مفرعه بالشارع ولبسها انسى موضوعه عندك اكثر من احتمال: ممكن تكون نصرانيه او يهوديه او حتى لادينيه فدائما راح تعطيها عذر لمظهرها وتصرفاتها

اما اذا كانت لافة المنديل على راسها فما عندك غير احتمال واحد اكيد

طبعا انها مسلمه..واي تصرف بيصدر منها هو اسائه للمسلمين وبالأخص المسلمات منهم.

فا اسائة فهم الحجاب غالبا بتكون منفذ سهل لأعدائنا ليعايرونا فيه ويطلعونا أمة غبيه سهلة مش محسوبلها حساب وبالأخر صار الحجاب(المتعارف عليه) سلاح ضدنا بدل ما يكون سلاح بايد المسلمه العفيفه.

This Post Has 9 Comments

  1. whisper

    المشكله في مجتمعنا انه كتير بعمم
    يعني هلأ وحده من هالاصناف اللي حكيتهم بشوفوها حد من العالم اللي بتفهم, بصيرو يحكولك هاااا شايفين المحجبات شو بعملو

    ليش المحجبات!!!…مين هالصبيه النغشه اللي بتمثل كزا الف؟؟؟ ومين هالصبيه اللي بدها ترضي اهلها بهالحجاب مش ربها اللي بتمثلني ويلا بتمثل اي انسانه بهالدنيا

    والله انا شعري بخزي و مش لاقيتله صرفه اقوم الف عليه سكارف واطلع الحلق من تحته, يحليني و يخليني ملفته اكتر من بشعر ما بصير احكي عن حالي محجبه

    عكلن مالنا ومال العالم انا ما بحب اجيب سيره حد :”)
    …الله يهدينا ويهديهم

  2. sozan

    بصراحه يا انس مش الكل هيك بس برضو المجتمع قبل انه البنت تعمل وتروح وتختلط مع الكل وفي هاي الحاله ما بتقدر تمنع الكلام بين الطرفين ومن هون باحكي انه طبيعة الكلام وترباية البنت هي اللي تفرض حالها وكتار من البنات اللي بتلاقيهم وسط عملهم اختلاط لكن هي ما بتعامل الا بنطاق العمل وترفض علاقات مريبه او خارج نطاق العمل

  3. Mohammad B. Irshid

    جد يا انوس بلشت تخبص يا صاحبي
    صديقي الموضوع ما الو علاقة باللي بتحكيه، وحتى لو فكل اللي حكيته الكل بعرفه تماماً بغضي النظر اذا معمول فيه او لأ بتضل حرية شخصية للبنت ما النا نجبرها على شي ابداً لانو لو اجبرناها بصير عن عدم اقتناع، صح؟؟؟
    مروة “قتلت” على مواضيع تطرف الها علاقة بالاسلام، ولا تستغرب، تابع الاخبار ورح تعرف انو في كاليفورنيا كمان قتل شيخ مسجد في بيته ولقيو على الحيط كتابات ضد العرب و المسلمين، يعني مسبات بالعربي..
    هلأ شو الفائدة من توضيح شو هو الحجاب؟؟؟ البنت ماتت و اعطتنا عمرها يعني خلص، والبنت ما خد بعرف شو كانت، واصلا الحجاب ما بحدد طبيعة البنت هاد عشان تكون على علم مسبق صديقي..
    ما حد بعرف ايش كانت و ايش اخلاقها، المهم انو انقتلت وليش بسبب الحجاب يعني؟ بالعربي عداء للاسلام يعني ضد الاسلام، هاد هو المهم، وهاد اثبته اهل البنت وزوجها و المحاميين االي تولوا القضية..

    انت ليش مركز على موضوع الحجاب وشو هو؟ انو شو حابب توصل فكرة؟؟؟؟

    بعدين بخصوص الوالد، سلملي عليه واحكيله، بحكيلك واحد انو اصابع ايديك مش متل بعض، وياما في مش محجبات رجلها بتسوى 99 محجبة ، هاد مش شرط ولا الو علاقة..
    انا مش عارف شو بخبص بس انت اخدت الموضوع لاشياء تانية ولا الها علاقة بالدنيا

    تحياتي

  4. ANAS

    هههههه طيب مالك معصب يزلمه روق روق
    🙂
    موضوع د.مروه مفصول تمام عن اللي بحكي فيه انا
    رحمة الله عليها انا مش ضدها 🙂
    بالعكس والله
    على كلن الفكره اللي حبيت اوصلها ويبدو اني فشلت فيها
    ان الناس اللي اطلقوه عليها اللقب وكل اللي حزنو عليها وكثير من اللي رفعو شعار الحجاب هم نفسهم مش عارفين شو الحجاب الصحيح وكيف بيكون على أصوله
    وسلمتلك على الوالد اللي صار يخبص بكلامه وحكالي سلم عليه يابا
    🙂
    بشكرك على صراحتك برأيك
    بس روق يمعلم فش اشي مستاهل

  5. ANAS

    معك سوزان انا ما قلت عن الكل
    انا بحكي عن نسبه لا بئس فيها موجوده بالفعل
    بس كمان المجتمع بيقبل الاختلاط؟؟
    مممم لو جينا عليها من ناحيه دينيه بحته وبما انه المجتمع كمان قسم الدين لثلاث نسخ زي ما انا حكيت
    فما اتوقع انه شي مقبول
    خطوه أولى لعودة الاسلام غريب زي ما نزل
    شكرا سوزان 🙂

  6. ANAS

    صحيح غلط نعمم
    بس تعالي على الناس التعميم موجود
    يعني مثلا كثير ناس بيكرهوا الملتحين والمتديين وبيعتبروهم نصابين وناس ماخده التدين قناع ليغطو فيه افعالهم
    بالتالي الغلط بيلبس الكل بعكس الاشي المنيح اللي دائما برأي الناس بيتخصص لشخص واحد بس

    يعني التعميم غلط
    🙂
    وأكيد انا بحكي عن ناس معينه
    واكيد كمان بحترم المحجبان وكثير بزعل لما الاقي محجبه بتتصيع وبتتصرف بشكل وقح لانها راح تكون ملفته للنظر وراح تعطي صوره زفتاشيه عن المحجبات الباقيات
    وام شعر مكنفش هاي مش ملفته للنظر وهي بشعرها تروح تلبس الحجاب اللي هو الستره ومشان وصرف النظر,تروح تلبسه مشان تلفت النظر؟ ههههههه
    هبله هاي ام شعر سلكه
    :p
    بقول نجيب ممثله ونخليها تحلق على الصر مشان تسير موضه جديده..بعدين المسكينه ترتاح من شعرها
    برضو مش غلط

  7. Dreamy Villager

    لمحمد..عبارة “وحده مفرعه بالشارع ولبسها انسى موضوعه” كنت بدي أعلق عليها زيك ..بس وقفت عند لبسها انسى موضوعه..ما اظن انها رح تكون ب99 محجبة.

    أنس..أنا بس قرأت الموضوع حسيت انه فيه لخبطة بس ما انتبهتش عليه غير لما حكى محمد..وهو انك نطيت من نقطة لنقطة لنقطة :)هسه أكيد انه الحجاب مش بس لبس..لأ وكمان سلوك زي أي اشي بدين تكون مقتنع فيه وطبقه بكل شروطه..بس انت بتحكي عن اللي بتخذوه ذريعة ليهاجمونا.. والله هذول شو ما عمل الواحد رح يهاجموه لأنه هدفهم الهجوم أصلا.. أنا بدافعش عن اللي محجبة وبتعمل اللي حكيته لأني ضده..بس كمان بقدرش أهاجمها وأنا ما قمتش بدوري بالنصيحة..الواحد المفروض دايما ينصح ويصحح الغلط مش بس ينتقد..ولا شو رأيك؟

  8. anOsyatE

    صح نطنطت كثير
    هاد من كتر ما بقعد مع سعداني
    😛
    الله يوخذو بحشره بكل اشي
    اها حلو حاسك انت يمكن اكتر وحده فهمتي الموضوع
    مش زي الباقي اللي فكروني ضد المحجاب واني بحاول انقب عن اخطائهم
    اللي بتمناه انه بس يحترمو هالزي اللي ميز المسلمه عن غيرها ..ويعطوه حقك بالاحترام بدل ما هو شعار بينرفع كل ما كلب تهجم على دينا الاسلامي
    شكرا دريمي
    🙂

  9. نادية

    انا بتعليقي هدا بحب اعرف معنى الايمان وهو ما وقر في القلب وظهر ع الجوارح يعني صورة متكامله ما فيها شي ناقص هداالايمان بتواصل في مع الله سبحانه وتعالى لازم يكون باجمل واكمل صوره والحجاب الو صفات اولا ان لا يصف ولا يشف وان لا يكون لباس شهره وبتخيل الكل واعي وبيعرف الصح والقران والسنه والعلماء وضحو كل شي وانا ضد وبشده حجاب هالايام نص الشعر مبين يعني كانها بتحكي انا محجبه او مو محجبه هي بتعطيك خيارات ليش احنا في برنامج مسابقات متلا ع كل حال قرانا وسنة نبينا موجودين ولي بدو يعرف ويحرف هدي مشكلته

اكتب تعليق على الموضوع ^__^