حياتي كمبيوتر

 

internet-geek

دائما على نااااافس الموال مستحيل يوم يمر من غير ما اخدلي جرعه مفرطه من القعده على الكبميوتر,بتبدأ بكاسة قهوه وبتنتهي بقوم عالنوووم بكرا عندك شغل والوقت تأخر.

فحتى مرات بقول طيب انا هاليوم شو كنت اسوي على الجهاز والله حد علمي فتحت المسنجر! اه وشو بعدين شيكت على الايميلات ونكشت مخي على لطفي شوي بعدين فتحت موقع اخوي تفرجت على الجديد هيك يعني حركه خمس دقايق وبعدين قمت تزانخت على حدو شوي ورجعت على الجهاز وفتحت لعبة باتل فيلد واخترت العرب وطخطخت الامريكان ونعنت ابو سنسفيلهم, بعدين بسكر اللعبه اللي حد علمي قعدت عليها ربع ساعه بس..شو هي الربع ساعه؟! مو كثيره صح؟

وبعدين بفتح موقع وببلش بحث على شغلات انا مو عارفها ولا يمكن استفيد منها حتى يعني بدور على اصل كلمة سنسفيل او بكتب كلمة منتجع الكتراز قبل ما انصدم بالمعلومه اللي بتحكيلي ولك هاذ سجن يزلمه!

او اني بفوت على شات اجنبي وبسير اقلدهم شو بيحكو

Asl

20 m jo

Hi

Bye

Go away

طبعا لما احكيلهم جو بفكروني واحد مهسهس عايش بالاسكا..لانهم بفكرو الكره الارضيه فش فيها غير اميركا وبريطانيا ومصر وفلسطين.

بعدين برجع على الجوجل وبعمل print screen وبسير احرف واتخوت .

 

 

 

 google

 

 

 

طبعا السرفيس فوق راسي شغال, على قولة شو بدك تاكل شو تشرب شو بعدك عايش ؟؟

بعد هيك بفتح الفوتو شوب وبسير اخبص مثلا بركب راسي على جسم واحد ازعر ومشطب او بجيب صوره مثلا فيها مجموعة وبقص اكبر وجه فيهم وبركبه على الباقي.

اخر شي بفتح على شات عربي وبصيدلي ايميلن ثلاث وبضحك عليهم وبحكيلهم انا بنت غنيه كثير وعندي املاك وعقارات واشي بهبل ومشان اركب الفلم صح بحكيلهم انا غير مرتبطه بحدا..

وبحطهم بلوك لوقت القطعات .يعني بركدا بركدا ما ضل اشي اتسلى فيه؟! وعلى سيرة بركدا كمان بحثت عن اصلها بجوجل الصور وطلعلي اول نتيجه صورة كتاب اسمه الفيزياء المسليه والثانيه صورة قشاطه..!

وكلو كلو هالحكي بلشت فيه الساعه خمسه ونص طيب والساعه صارت 1 ونص  ليش؟ وانا كل اللي قعدتهم نص ساعه بس. يعني يا اما ساعتنا غلط او انها غلط ساعتنا.!

أو انا عيشتي غلط,كل الاحتمالات وارده.!

This Post Has 9 Comments

  1. whisper

    ما بعرف ليش الوقت بمشي طيران وانا عالنت
    فجأه بتصير الساعه 2 الصبح و تاني يوم عندي دوام 🙁

    بس اكيد ما بمشي بنفس مغامراتك اليوميه عالنت
    بس في اشياء متشابهه زي الجوجل
    كتير بجرب اشياء ما الها معنى عالصور بالذات و دايما بطلع اشياء نهفات 🙂

  2. 3loosh

    ياااااااااا سلاااااام وانا برضه كمان بس الفرق انه في عندي ناااااس دايما لاحقيني بدهم يقعدوا ع النت لذلك بحاول ما اروح هون ولا هون او اجرب اشياء متل القوقل لانه وقتي ثمييييين ههههههه وانت انووس عارف مين الناس الي لاحقيني صح؟؟ ههههههه

    يسلموووووووا يا انووس على المواضيعع الدايما فززيعه وحلوة

  3. sozan

    بيني وبينك الكمبيوتر داء لما يصيب الانسان صعب الخلاص منه

  4. ميّـاسي

    إدمان زي حالاتي
    الله يشفينا جميع!!!

    التصميم الجديد عاجبني كتير رايق:)

  5. anas

    whisper
    الحمد لله..الحمد لله ..طلعت مش مجنون انا 😛
    كنت افكر فش حدا زيي ..بس بتعرفي ؟ شكلك بتقعدي على النت كثير..مشانك ماشالله عليكي حركتك ملحوظه بين المدونات .
    يا ستي المهم.. كيف دوامك اليوم؟

  6. anas

    علووووش الفززززيعه
    يا عيني على ام وقت ثمين..وجماعتك بعدهم زي ما هم؟
    بعينك الله ..اسكني بهاواي هناك ما حدا بيحكيلك يلا قومي هلأ دوري

  7. anas

    سوزاااااااااااان وين هالغيبه؟
    الحمد لله على سلامتك..بعدين مش لازم الداء يصيب الناس مشان يتذكرو يسلمو على بعض 😛
    اهلا وسهلا فيكي والله يعافينا من الدائات والشغلات اللي زي هيك

  8. anas

    مياسي وانتي كمان؟؟
    ليش انا ماخد فكره انه بس الشباب عندهم ادمان نت وكمبيوتر؟
    قولتك الله يشفي الجميع
    وشكرا الك ..فعلا الستايل هاد “الى الان” مناسب ومتناسق مع الاضافات ومع اصدار وورد بريس الجديد
    يا رب اثبت ادعولي بالثبات

    على القالب يعني 😛

  9. FOX

    اخر شي بفتح على شات عربي وبصيدلي ايميلن ثلاث وبضحك عليهم وبحكيلهم انا بنت غنيه كثير وعندي املاك وعقارات واشي بهبل ومشان اركب الفلم صح بحكيلهم انا غير مرتبطه بحدا..
    بتذكرني بعمالي انا وانت و لوي
    ههههههههههههههههههههههههههههه
    طيب انا شو اعمل بحياتي يا انوس كل حياتي النت انت عارف
    و بالاخر بعين الله

اكتب تعليق على الموضوع ^__^