همة جمهور

كتغيير وكسر للروتين اليوم رحت مع الشباب على القهوه لمشاهدة مباراة كرة القدم بين الوحدات

وشباب

انا بطبيعتي ما بحب جو القهاوي ولا بطيق ريحة الاراجيل,لكني نحطيت بموقف محرج واضطريت

احضر المباراه كوني “محسوب على الشباب” بالتعبير الدارج

.

.

المباراه كانت ممله خلال الشوط الأول حيث كانو بيتراكظو بالملعب مثل الرخويات

والوحداتيه شادين على حالهم وكأن الخصم هو مانشستر يونايتد او اي فريق عنده وضع ممتاز على

مستوى العالم

.

ما بقصد التحقير من قدرات اللاعبين سواء كانو بالمنتخب الوطني أو اي نادي تابع

لكن لكرهي لهذي الرياضه وعدم رغبتي بجعلها شي اساسي بحياتي مثل اغلبية الشباب بقول ان من

السخافه انك يطلع صوتك لمجرد تحقيق هدف او ضياعه

وهذا بالضبط اللي صار ,بعد ما تحقق الهدف الأول لصالح نادي الوحدات ,قامت “الشبيحه”تصرخ

وتقلب الاراجيل وتعمل جو مصغر شبيه بالحاصل بالستاد.

ما بعرف ليش اخجلت من حالي وضليتني قاعد بمكاني ,وانو شو اللي جابني مع هالمصاريع

وقامت الشباب تستفزني ولك قوم صرخ وهيص معنا ولشو جاي معنا ومن هالحكي

بالعافيه لمسكت حالي وضليت مرابط واقنع بنفسي اني اندمج معهم

لكن المخجل بالفعل صار لما حققو هدف التعادل

سكتت الشباب,بعدين صارت تسب وتكفر وكانو بدهم يضربو العامل المصري لأنه صفق كأشاراه للحماس

وتغير الجو الكئيب الي غمم مع سحابات دخان الأراجيل

بهاللحظه بالذات تذكرت صوت الشباب اللي كانو واقفين على ابواب المسجد الأقصى عند محاولة اليهود

لدخول المسجد في عيد الفصح العبري

وهم بقولو “بالروح بالدم نفديك يا اقصى” وتذكرت صوت المذيع على اذاعه “حياة اف ام” وهو

بيعلق على صوتهم وبقول ها هم اسود الأمه ها هم شموسها وبيارقها وصوته مش طالع من خنقتة

دموعه

يوم ما اجرت الاذاعه اتصال هاتفي مع منظم الاعتصام وكانت اصواتهم مزلزه فعلا,رغم قلة عددهم

وحيلتهم

جمهور صغير بهمم كبيره وتأثير أكبر ,صرخات حقيقيه صادره من قلوب تتألم لحالنا المخزي

..

بيعلق احد الشباب وبقول ,شوف شوف جمهور الوحدات المرعب

وانا بقول بنفسي شايف يا صاحبي العلم الأخضر بلولح فوق روسهم وشايف اللفحات وصورة قبة

الصخره على الطرفين الأحمر والأخضر اللي خليتو منها رمز عنصري بين الأخوان بالدم والدين

صراحه الجمهور كان ضخم جدا وبالفعل على حسب تعبير صاحبي كان مرعب كمان

لكن على شو ومشان شو؟؟

مشان يطلعو من الستاد على العالم ويكسروها ومشان يكونو ايد وحده ضد اي شخص معادي

للنادي

يمكن كثير تكرر الموضوع ودائما بتكون العنصريه من الخلال المباريات هي المثال الحاضر في كل

بهدله للسخافتنا

لكني وبصراحه أول مره بعيش الجو وبشوف المثال قدام عيوني وعلى مسمعي

..

ولازم اقول اني اشكر ربي على اني غير متابع للمباريات كانت محليه او عالميه واني لا انتمي نهائيا

لأي نادي أو منتخب

انتمائي الوحيد هو لديني الأسلام, واتمنى يجي اليوم اللي نتوحد فيه على الأقل على أساس العروبه,

وبعدييييين منقول على اساس الدين

هاد بحال بطلنا الرايه الخضرا والرايه الزرقا وحملنا رايه وحده والكم تختارو لونها

This Post Has 12 Comments

  1. Amjad

    الرياضة عندنا تفسد ما بقي صالحا من أمور …
    والله شد الحبل و كثير علينا كمان

  2. خالد ابو علي

    والله يا صاحبي هاي حركات بحس انهم بلعبو ع فلسطين

    يعني الاي بفوز بحتلها 22 واحد بركضو ورى قماشة

    لا ولما الواحد فيهم فريقو خسر

    بتحس انو خسر امو مو مباراة

    وبتولع مدابح بين الجمهور

    ووحياة الله يا انس انو الفريقين الي بكونو يلعبو بكونو صحاب وسهرانين مع بعض وعلى عيني

    بس هاي عالم مخها ما بتعرف شو بوجعو

  3. ميّـاسي

    العنصريه في الرياضه
    ولا عمري فهمتها!!!

  4. FOX

    مش منهم من الي براسهم لحالهم بموتو

  5. anOsyatE

    واذا ما ماتو يا فراس؟ شو الحل؟

  6. anOsyatE

    مياسي هلأ عن جد عمرك ما سمعتب بالعنصريه بالرياضه؟ هاد يا ستي بصراحه تااااااامه الوحداتيه من اصل فلسطيني والفيصلي اردني وصار عيب على الاردني يشجع الوحداتي والعكس صحيح وانا لهاد السبب بالذات ما بتابع المباريات ولا اللي مزاج فيها ,هاي هي العنصريه بالرياضه ولسه اكتر من هيك

  7. anOsyatE

    ميييييييييييييييييييييييييييييييييييييييييييييييييييييييييييييييييييين؟؟ ابووو علووووووووووووووووووش؟؟ مو معقووووووول
    بتعرف شغله دايما بتعجبني بحداقتك وحكمتك 🙂 انا بقول من حق كل واحد يشع النادي اللي بده اياه ومن حقه يزعل لخسارته ويفرح لفوزه لكن بالعقل وومش بهالاندفاع اللي منشوفه وكمان يشجع الننادي اللي بيلعب صح مو لأنك فلسطيني تشجع الوحدات ولأنك اردني تشجع الفيصلي؟
    وانت عارف الرياضه لسه مثال بسييييييييييط على الحيونه العربيه 🙂
    بحب تعليقاتك يا شيخ 😛

  8. anOsyatE

    معلم أمجد اصلا احنا متل بسطه تلفونات بمجمع وسط البلد قد ما حاولت تستصلح ما راح تقدر, والرياضه ما بتلبقنا من الأصل لأنها مثال على الفساد,هيك تعودنا,وعلى قولتك شد الحبل كثير علينا حتى لو كان الطرف الثاني عامود

  9. علووووش

    السلام عليكم
    فعلا االموضوع كتتير حلو وفعلا انه حاصل كتتير هاي الايام بين الشباب المسلم المجاهد الي لازم ينهض لحمايه دينه ومقدساته
    بس المشكله انه بحكوا دايما لما تناقشهم عن فلسطين واليهود بقولولك فلسطين للفلسطينيه تخييل الجهل والعنصريه الغبيه
    المشكله انه لما تناقشلك واحد جامعي وخريج يا سلالام قمه الجهل لما يحكيلك انه اولادنا الصغار مش لازم يتفرجوا على اي اشي اله دخل بفلسطين او باطفال فلسطين ليش همه شو دخلهم اتخيلوا الغباء بدل ما يحكي لا والله بنخلي اولادنا من همه اصغار بالصورة ونوعيهم بحقنا في حمايه اخوانا ومقدساتنا ولكن لا حياه لمن تنادي

    الله ينصر اخوانا المجاهدين في كل مكان في فلسطين والعراق ولبنان وسائر بلاد الارض اميييييييييييييييييييييين قولوا امين

    وموضوعك اكتر من رائع انس الله يعطيك العافيه

  10. خالد ابو علي

    حبيبي يا انوووس ما في شي من واجبك يا صاحبي شو كم انووس عنا

    وابشر يا صاحبي وين ما تتلفت رح تلاقيني وراك ولا احكيلك مشان ما تنئز بتلائيني جنبك احسن مو؟

  11. whisper

    يعني الواحد بس يكونو بدهم اياه ياخد الموضوع ببساطه بحكوله خللي روحك رياضيه!!!

    بس عالروح الرياضيه اللي عنا بتصير هالكلمه يعني يا اضربو موس بنص وجهه يا طخه 🙂

    شكرا انس انك حاطط قصصي الطرمه ضمن منطقه اعجبوني 😀

  12. anOsyatE

    ههههههههه مزبوط لما تحكي لواحد عاملني بروح رياضيه كأنك بتحكيلو اشمطني شلوت وصلني لعنان السموات
    وقصصك بالفعل طرمه وانا بموت على الطرم
    😛
    وأكيد لازم تعجبني 🙂

اكتب تعليق على الموضوع ^__^