دينار حديد

الله يرحمك يا جده , ضحكت من كل قلبي وانا بدور بالصور ,لما شفت صورة الدينار الاردني الحديد ,اللي كان يشبه التعريفه
تذكرت ايام ما (حَوًشت)اربع ليرات مشان اشتري سَقاطه حديد ملونه, وكنت مستقتل عليها لانها فيها ميزة ,بتقدر تفتحها بدون ما تخربها , وبترجع تعبيها من اول وجديد
وكانت عادة معروفة عنا احنا الصغار..يعني مكناش صغار كتير ,انك لما تشتري سقاطه جديده , بتعملك لفه على عمامك وابوك وامك وجدودك ,الاحياء منهم طبعا… , وكل واحد فيهم بضحك عليك بشوية فراطه ,بمناسبة السقاطه الجديده
اما انا اول ما جبتها وطاير عقلي فيها ,اول واحد رحتلو جدتي,لانها كانت هي اول من بحطلي فيها
كانت مرات شلن, عشر قروش , مرات ها ربع ليرة , وان طبشها السعدان كانت تحطلي فيها نص
وقفت عندها, اه يا تيتي انا شريت سقاطه جديده شو بدك تحطيلي فيها؟؟
ضحكتلي وحكتلي هلأ شوف كيف بدي اعبيلك اياها,وخليها تخرخش
تعبيلي اياها؟؟؟ جد بتحكي بسيرو كتار يعني؟؟؟
ضحكت جدتي بصوت عالي ,وطالت من تحت فرشة التخت , ((جزدان ))على حسب ما كانت تسميه
وبلشت تسقطلي فيها ,ها هي واحد ,وهي تنين , وهي تلاته,واربعه, واخر وحده هي خمسه
شو يومها انا طاير من الفرح جدتي سقطتلي خمس شلون جوه السقاطه الجديده (انا هيك كنت مفكر بالاول خمس شلون )وكالعاده كملت اللفة على عمي وابوي واللي طقعلي طقعلي ,واللي حط حط
اها,هلأ السقاطه تقلت , وانا مفش عندي صبر, بلش الوسواس يلعب بمخي
افتحها ولا لأ؟ افتحها ولالأ؟
اخر شي قررت اني لازم افتحها , وبدي اشوف شو فيها,
!!!يااااااااااااااااااااااااااااااااااااااللهول
شو هاد اللي انا شايفو جوه؟؟
رحت لامي وورجيتها اللمه وطلبت منها تعدلي اياهم,
بعد ما عدتهم ,,طلعو 6 ليرات وربع,,معقول؟؟؟6ليرات وربع!!!من وين اجو هدول؟؟
وبعد تحقيقات وتحريات
اكتشفت انو جدتي كانت حابه تعطيني شلن مقسم على خمس قروش,يعني لما كانت تعدلي واحد تنين …خمسه, كانت بتحطلي بكل عدد دينار ,,وهي مفكره حالها بتحطلي قروش, بنيتها تحمسني وتخليني انبسط,بشرط انها ما تخسر الكتير
مشيت على مبدأ ((نفع صاحبك ,,باللي ما يضرك))ويومها حلفت ميت يمين ,وراسها وميت سيف إلا اني ارجعلها الخمس ليرات ((القروش)) , وراحو علي الخمس ليرات وراح علي الشلن , وراحت جدتي كمان

This Post Has 12 Comments

  1. دحدح

    بس ظليت إنت يا خسارة

  2. مياسي

    ضروري يعني هالأمانه؟؟

    كان أخدتهم و ما حد أخو حدا!!!

    هاي أيام الدنانير الحديد أيام سودا

    الواحد كان بيطلع للكونترول دينار ع أساس انو شلن يا سلاااام

    بس الكل كان متفق أيامها انو الدينار كانت هيبتو ضايعه

    بس هسه حتى ” العشره الزرقا” هيبتها قلت

    تاري الموضوع مالوش دخل بالحديد و الورق

    خربانه يعني

  3. eNAS

    Ma sha2 Allah 3nak 6’amerak wa3i mn zaman…
    Bs fe3lan el dinar el7adeed galal hebet el floos 3l a5eer
    6eeb 3omrak shoft el robo3 dinar ta3t zaman
    walah bet7sha dinar 3la 2ad ma hei kbereh
    By the way ana ash6ar menak
    kan ma3i 7a9alah 3 saneen lama 5alaset tawjehi ft7tha>>>bs 3njad kano 7rzaneen 🙂

  4. 36ooor

    اهلا اهلا لدينا حشرة هنا
    على فكرة كنا نحكي عن الولد الملطشه عنا بالحارة دحدح
    وانت افهم شو قصدي بملطشه

    والله تيجي للصحيح لسا احنا احسن من غيرنا انتي بتعرفي انو بالصين اكتر يوم بكرهو هو يوم القبضه؟
    هاد مشان الواحد فيهم بروح على البيت حامل شوال ((ينات))ورق وقيمتهم ارخص من عددهم
    والعمله الورق الوحيده بالاردن اللي محتفظه بهيبتها هي الخمسين
    كيف لأ!!؟؟ وعليها صورة جلالتو
    على سيرة الضمير بهديكي هالاغنيه
    ((اجيال ورى اجيال هتعيش على حلمنا))

  5. 36ooor

    والله يا نوسا ذكرتيني بالربع القديمه
    ييييي الله يرحم
    هاي كانو جدونا لما يخلص منهم الرصاص وهم بحاربو اليهود
    كانو يبلشو تقنيص بالرباع ,مشان هيك صنعوها كبيرة

    وكمان انتي بهديكي نفس الاغنية تبعت مياسي

    اه صح كم طلعت تحويشتك؟

  6. أبو ناصر

    ولكن جميع الفئات النقدية الورقية تحمل صورة جلالته أو أحد آباه البناة، فلا تكن جاهلاً فتهذر شمالاً ويميناً، ومحاولة النفاق عنك فاشلة، ولن تجمع المجد نفاقاً فلتسكت بوقك الكاذب وإلا سنعرف ماذا نفعل

  7. eNAS

    Tafseer 7eloo lal robo3 🙂

    Thanks for the song..thakartni be a5er “8emeh 3rabeh”!

    yefdal sho3a3 elnoor yo9al le ab3ad samah>> :]
    da 7elmna 6ool 3omrena>>?

  8. مياسي

    صحيح أنا و لا بعمري كان عندي حصاله

    طول عمر ايدي “مخرومه” و لا بعرف أضب تعريفه

    مرات كنت أفكر بالموضوع بعدين أكسل و أتراجع شو بدي فيها؟؟

  9. 36ooor

    الاحمق اللي عارف حالو
    ان كنت ابن كمشة ناس فاحنا ولاد عشاير
    ………………

    ههههههههههه خدلك وجاي يحكيلي لا تهز
    ذنب كمان
    هع هع
    ….اسمع اللي بطلع بيدك
    اه سوري لازم اكون مهزب

    اعلى ما بخيلك اركبو
    درقن درقن
    مع العلم انا احترم جميع الاسرة الهاشميه لاني اردني وواجبي كمواطن احترم مليكي
    يعني لا تعوي ولا تنبح عندي انت مش ادرى مني بوطنيتي
    يااااااااااااااااا احمق

    صح نوسا؟ الاغنيه حلوة كتير
    بس صارت دقة قديمه في وحده احلى منها
    ما بعرف اسمها بس كلها مشاهد حقيقيه وبتخوف

    مياسي اوعي تسمعك جدتي اللي بعدها عايشه
    والله غير تعملك فركة اذن وتخليكي تكتبي هد المثل ميت مره
    ((خبي قرشك الاسود ليومك الابيض))

    !!!سوري تيتي القرش موش اسود القرش بني

  10. Amjad Wadiِ

    لووووووووووول على دحدح

    هيك فقعته اياها بالوجه

    الله يرحم جدتك … معقول رجعتلها المصاري 🙂

    لما نزلت على الأردن آخر مرة أعطيت ابن اختي شلن .. زتوا بوجهي .. و اسبوع ما حكى معي … شلن!!!!!!!!

    لو بعرف يسولف كان قلي: هاي لو جاي من الغور بتزت علي تعريفة … بعد يومين عرفت انه يا بتعطي ربع ليرة يا بلاش – هاي لتحت سن الــ 4

  11. vagueraz

    loooooooooooooooooooool…
    allah yr7am jedetak ,,,,

    zamaaaaaan kan el 1JD yswa w el shelen !!!!
    hala2 wala eshy !!

  12. 36ooor

    هههههههههههه
    كسرة والله يا امجد
    لهلأ بتذكر ايام ما كان مصروفي عشر قروش و ارجع منو شلن

    رزان؟؟
    هيك اسمك صح؟؟

    شكلها راح ترجع ايام المقايضه
    شكرا على المرور ترى انتي اول واحدبعلقلي من اول ما سويت الصفحه
    اهلا والله وزيارة طيبه 🙂

اكتب تعليق على الموضوع ^__^